خاص. وفد من الشباب والنشطاء المغاربة مشا لإسرائيل.. ها تفاصيل البروگرام والأسماء المشاركة وقضايا الهولوكست واتفاقيات ابراهيم حاضرة ولقاء مع بن شباط .

كود ـ الرباط//

كشفت وثيقة حصلت عليها “كود” على تفاصيل زيارة مثيرة للجدل كيقوم بها وفد كيتكون من شباب ونشطاء مغاربة لإسرائيل فهاد الأيام، وبالضبط ما بين 16 و22 يوليوز 2026.

هاد الزيارة، لي منظماها جمعية “شراكة” بتنسيق وتعاون مع “مؤتمر المطالبات” المعني بالحقوق المادية لليهود ضد ألمانيا، جات فوقت حساس بزاف وكتضم لائحة من الأسماء المغربية الشابة لي غادية تشارك فلقاءات وأنشطة مبرمجة بدقة.

وبخصوص تفاصيل هاد الرحلة المثيرة، فالبرنامج لي حصلات عليه “كود” كيبين باللي الوفد غادي يدوز من بزاف ديال المحطات الحساسة، منها لقاءات سياسية فقلب الكنيست الإسرائيلي ومع مسؤولين بحال “مئير بن شباط” فمعهد مسغاف لبحث مستقبل اتفاقيات أبراهام، بالإضافة لزيارات ميدانية لمواقع شهدات أحداث السابع من أكتوبر بحال موقع مهرجان “نوفا” الموسيقي وكيبوتس “نير عوز”.

ومن جهة أخرى، البرنامج كيركز بزاف على قضية الهولوكوست من خلال زيارات لمتحف “ياد فاشيم” والمشاركة فنقاشات وندوات كتهم إدراج تعليم المحرقة فالمناهج الدراسية، بلا ما ننساو الشق الروحي والثقافي لي كيشمل عشاء مع ناجين من الهولوكوست، ولقاءات مع عرب إسرائيل من حركة “أتنا” والطائفة الدرزية، وزيارة لقبر الحاخام المغربي الشهير “بابا سالي” في نتيفوت.

أما بالنسبة للائحة المغاربة لي كاينين فهاد الوفد، فكيقودها يوسف الزهاري لي هو مدير مكتب جمعية “شراكة” فالمغرب. اللائحة كتجمع بروفايلات متنوعة من مجالات مختلفة، بحال الدكتورة والمهندسة رغدة جباد المتخصصة فالمناخ والموانئ، والناشط فمجال الفندقة عبد الحق بخيي، والمرشدة السياحية غيتة الحالك لي مهتمة بحوار الأديان. كاين معاهم كذلك عبد الله دامور رئيس المؤسسة الدولية للدبلوماسية والتنمية المستدامة، وطالبة التمريض هبة العيود، والباحثة بسلك الدكتوراه صفاء ريتشان لي هي رئيسة رابطة كاتبات المغرب وإفريقيا بفرع مراكش. هاد الوفد كايضم حتى الفاعل الجمعوي محمد توفيق، وطالب القانون إدريس زيتوني الناشط فمؤسسة “رحلة” للفنون الحية، والناشط ف الثقافة عبد اللطيف نحيلة، بالإضافة لعمر الشابلي الباحث فالسوسيولوجيا والمهتم بالتراث الأمازيغي واليهودي، ووفاء غنامي خريجة الهندسة المالية، والمقاول عبد الرحيم محتيج الناشط فمجالات العقار والفندقة والتسويق.