مساجات البام فبرشيد: مسيرة ولد زروال جديدة وها علاش الجوكير لقجع مزال معلنش التحاقو بالتراكتور وبشروطو والتوقيت هو لي يختارو ماشي المنصوري ولا بنسعيد .

مصدر الصورة

احمد الطيب كود الرباط//

حزب الأصالة والمعاصرة، داير مسيرة ولد زروال جديدة، دار حملة استقطابات كثيرة بسرعة البرق، طير رئيس جهة الداخلة واد الذهب من حزب الاستقلال بأساليب الترحال السياسي للي مزال بلادنا ما بغاتش تقطع معها، ودا مرشحين ومنتخبين خراين من احزاب اخرى.

الغريب فهادشي، هو صمت الاحزاب، سكوت حزب الاستقلال من عودة البلقنة والترحال القسري للأعيان والمنتخبين. سكت حيث بركة اللي مناسب مع المنصوري. واش بسبب الزواج بين نبيل بركة والمنصوري، سي نزار نسا مواقفو وغواتو كيف دار على تسريبات جبروت وخشا راسو فرمال الداخلة؟.

حتى البي جي دي ساكت، من غير زعيمهم بنكيران للي تالف سياسيا رجع كيتهم جهات فالدولة بالتحكم فالمشهد السياسي.

لبارح البام دار لقاء حاشد ف برشيد، وصفات مصادر حزبية بأنه مسيرة ولد زروال جديدة، غير الجديد فيها هاد المرة هو ان ولد زروال أوت ومغاديش يترشح معهم.

قيادة البام روجات فايك باللي ممكن يحضر معاهم فوزي لقجع فهاد اللقاء. حتى المعني بالامر ما فراسوش. كانو باغين يديرو من اللقاء بداية الزحف الانتخابية باستعمال اسم لقجع.

المنصوري وبنسعيد، كان هدفهم هو استغلال اسم لقجع، الاخير مطور وفاهم وقاري السياسة مزيانة، داكشي علاش ما جاش ليهم. اصلا ما كانش فالمغرب باش دار الاجتماع. وصل من ميريكان مع الاسود الساعات الاولى من يومه الاحد 12 يوليوز. لقجع لحد الان مازال ما حددش وقتاش يكون فالبام وكيفاش يلتاحق واش من شروط.

باش تعرفو المكر السياسي، ومحاولة تبييض وجه البام، خرجة بنسعيد فلقاء برشيد للي قال بأن ما أثير عقب التحاق قيادات سياسية جديدة بالحزب، بأن هذا الالتحاق هو سياسي وليس انتخابي كما يروج له البعض، وهذه الأقاويل لن تؤثر على الحزب، مؤكدا بأن الحزب سيقدم برنامجه الانتخابي للمواطنات والمواطنين بإجراءات واقعية لمواجهة التحديات في مقدمتها الغلاء الذي تعاني منه الأسر المغربية، داعيا إلى عدم إخفاء الحقيقة وإثارة المشاكل التي يعاني منها المواطن المغربي. تصريح مامفهومش واش كيقصد بلي جاي لقجع غير على ود الانتخابات ولا على ود ايمانو بالمشروع السياسي للبام؟.

لقجع حداثي وديمقراطي، ماشي بالأقوال والادعاءات، شوفو غير تدبيرو لقوانين المالية، وكيفاش يتقبل اراء قاسية واحيانا كتوصل باتهامات خطيرة من طرف اصوات يسارية ف لجنة المالية (مثلا فيدرالية اليسار والبي جي دي والمعارضة..). ويجاوب على كل صغيرة وكبيرة، فالمقابل راه وزراء بحال بنسعيد والمنصوري، شويا ديال الانتقاد كيتقلقو، اما لي كتنشر الصحافة كيزعجهم لدرجة مكرهوش يحطو بيهم شكايات كل نهار وطلب تعويض.

قيادات فحزب البام ولات كتروج بلي رابحا الانتخابات من دبا، مع خبر التحاق جوكير الميزانية فوزي لقجع للحزب، سبق صناديق الاقتراع وضربو فمبدأ دستوري : الاختيار الديمقراطي.

التراكتور بالمنصوري وبنسعيد ما يربح حتى 40 مقعد فمجلس النواب المقبل. هاد الاستقطابات كاينة حيث باميين او غيرهم عارفين لقجع جاي لعندهم. تايقين فيه ماشي فالمنصوري وبنسعيد اللي ما يقدروش يديرو حملة انتخابية مع لفضايح اللي تنشرات وغادية تنشر عليهم