فاش خرجات فاطمة الزهراء المنصوري وسمير كودار القياديان في حزب الأصالة والمعاصرة، في توقيت واحد تقريبا، باش يقولو بلي الحزب ديال التراكتور فاتح حوار مع فوزي لقجع وزير الميزانية، ورئيس جامعة الكرة، وزوج عضوة من المكتب السياسي ديال نفس الحزب، المفاوضات لي الغرض منها حسب لي قالو هو الانضمام ديال فوزي للبام.

فاش خرجو هاد التصريحات، لي مأكدهاش لقجع وفي نفس الوقت ما نفاهاش، كان معروف ان هادشي مغيدوزش هاكاك.

حيت صعيب الواحد يقتنع بلي لقجع غيرضى بمجرد الانخراط في الحزب فقط، او مجرد يترشح في شي دائرة بالإسم ديال البام.

بروفيل لقجع ما يمكنش يكون في حزب سياسي إلا في موقع القائد، وسدات مدام.

حيت كونو رئيس اهم جامعة رياضية في المغرب، وعضو المكتب التنفيذي ديال الفيفا، ووزير شاد واحدة من اهم الوزارات لي هكلفة بالميزانية العامة ديال الدولة، وكذلك كونو الرئيس ديال مؤسسة المغرب 2030 لي غتشرف على اهم الأوراش المرتبطة بالمونديال، وخصوصا على مستوى البنيات التحتية، وغير هاد المؤسسة غتخلي المنصب ديالو بحال منصب رئيس الحكومة، وربما الميزانيات لي غتكون تحت التصرف ديالو، مغتكونش عند شلا وزارات مجتمعة.

كونو هاد الشي كلو، ما عند صفة نائب برلماني ما تضيف ليه، ومعندو ما يدير بها، وخصوصا انه غيكون في حالة تنافي سواء قانونية أو سياسية.
وما عند صفة عضو المكتب السياسي ديال حزب البام، ما تضيف ليه.

غير تخيل انه مجرد عضو مكتب سياسي بحالو بحال بنضو وكوكوس، تحت قيادة فاطمة الزهراء المنصور المهدي بنسعيد وفاطمة الحساني/ القيادة الثلاثية، ما كيدخلش للمنطق والأعراف السياسية.

ماشي تقليل من هاد الأسماء، ولكن راه لقجع بمناصبه وخبراته وشعبيته والكاريزما لي عندو، وقبل داك الشي الثقة الملكية لي تجددات فيه في أكثر من ملف، كيقود إلى ان الجلابة ديالو اوسع من انه يستعوبها مجرد عضو مكتب سياسي ديال البام. وليه فيه للصراحة شلا كوفرات.

النتيجة، هي اننا اليوم مع فرضية قيادة لقجع للبام، ولي ممكن يأدي إلى انه يكون رئيس الحكومة المقبل.
هادي مجرد فرضية، يمكن تصدق ويمكن ما تصدقش.
شخصيا، انا ما ممتحمساش لهاد الفرضية، ومازال كيبانلي بلي السيد غيكون مفيد اكثر في المناصب لي شاداها حاليا.
لكن الحاجة الغريبة، هي مال الاتحاد الاشتراكي بوحدو لي خارج بوجه مكشوف لمحاربة أي إمكانية لتححق هاد السيناريو.

لي نورمالمو خاص يكون منزعج من هاد الطموح إذا كان بالفعل صحيح هو التجمع الوطني للأحرار. حيت كل المؤشرات كتقول ان الصراع على الرتبة الأولى في الانتخابات القادمة مغديش يخرج على الثلاثي ديال الأغلبية/ الأحرار والبام والاستقلال.

وخصوصا فاش مجموعة من الناس لي ترشحو سابقا باسم الأحرار، كيبان بحال تيقو بالفعل بلي الحكومة المقبلة غتكون تحت قيادة البام، وأعلنوا الرحيل ديالهوم نحو التراكتورـ وهادشي مخفاهش الطالبي العلمي في واحد الخرجة، لي قال فيها بلي الأحرار ماغاديش يأثر عليهوم انسحاب هادو من الحزب.

لحد الآن ما لقينا حتىشي تصريح أو تلميح من طرف الأحرار كيفيد الانزعاج ديالهوم من غمكانية انخراط لقجع في البام.

الناس كدير الأنشطة ديالها، والتجمعات، وكدافع على الحصيلة ديالها، وماداخلاش فهاد النقاش بالمرة.

الاتحاد الاشتراكي هو لي بوحدو مضارب مع لقجع، ولقجع ربما كاع ما راد البال للاتحاد الاشتراكي.

بيان ديال المكتب السياسي ديال حزب لشكر كيقطر الشمع على السيد، وثلاثة ديال الافتتاحيات ديال الجريدة، وشلا تدوينات ديال المقربين من لشكر.
حتى المونديال دخلوه وليدات لشكر في الهجوم على لقجع، وتقطار الشمع عليه.

فاش كانت الكرة غادة مزيان مع المنتخب فالمونديال، خرجو كيحذرو من استغلال نتائج المونديال في الانتخابات.

السيد ما زال ما انضم حتى لشي حزب، ومضارب ديك الأيامات مع المنتخب فأمريكا ومع المهام ديالو الحكومية، بما فيها الحضور للجن البرلمانية، والإعداد لما تبقى من فصول الميزانية، ووضع قاعدة بيانات مشروع الميزانية القادمة لي خاص تخليها الحكومة الحالية للحكومة المقبلة، والخوت في الاتحاد الاشتراكي كيحذرو من استغلال نتائج المنتخب في الانتخابات.

واش المغاربة زعما قاصرين حتى لهاد الدرجة باش يصوتو مثلا للتراكتور حيت الصيباري ماركا هدف.
وفاش تقصى المغرب من ربع نهاية المونديال، خرجات تدوينات من مطبح الاتحاد الاشتراكي كتقطر الشمع: واش لي ما قدش يقود المغرب لنصف نهائي المونديال، غيقد ينجح في رئاسة الحكومة.

المغاربة ديك الليلة كانو عايشين الشمتة والأعصاب، ووليدات ادريس يمكن كانو فرحانين، حيت لقاوها مناصبة للشماتة في لقجع، بحالا المنتخب ديال لقجع ماشي ديال المغاربة.

وصول المغرب لربع نهاية المونديال إنجاز، كيما هو الوصول لنصف نهاية مونديال قطر، والفوز بكأس إفريقيا، وكأس العالم للشباب، والميدالية النحاسية في الألعاب الأولمبية، وشلا إنجازات، وهادشي بفضل سياسة ملكية ذكية، وبفضل التدبير الجيد ديال رئيس الجامعة لي كان عند حسن ظن الثقة الملكية.

وهاد النجاحات ديال المغاربة كاملين، وخاص نفتخرو بيها كلنا، ونشكرو كل لي ساهمو فيها.
ولحد الآن حتى حد ما استغلها لا سياسيا ولا انتخابيا، فلاش هاد اللعب الخايب والتقلاز من تحت الجلابة؟
وكيبقى السؤال: مال الاتحاد الاشتراكي بوحدو لي حامية فيه البيضة؟

كاين لي كيروج ومن داخل الاتحاد الاشتراكي للأسف، ان هاد الشي حرب بالوكالة لصالح أخنوش لي وعد الاتحاد الاشتراكي يكون جزء من الحكومة المقبلة في حالة تصدر الأحرار للانتخابات، وإخراج البام من الحكومة.

وهو نفسو تقريبا لي كان كيروجو لشكر في الانتخابات السابقة، انه عندو كلمة أخنوش، جزاء على ديك الشي لي دار لشكر مع البيجيدي.
والحقيقة لي بانت من بعد، ان اخنوش ما وعد لشكر بحتى حاجة، ولا طلب منو شي حاجة، كيما ما طلب منو حتى حاجة دابا.
لشكر كيقوم بعرض الخدمات لي ما طلبها حد منو، انطلاقا من قراءات خاطئة.

واجه البيجيدي قبل باش يرضى عليه اخنوش عند بالو، واليوم كيرسل رسالة لقيادة الأحرار حالياـ بلي شوفوني كنواجه الخصم السياسي ديالكوم في الانتخابات القادمة.
مع العلم، لا لقجع حسم الانضمام ديالو للبام، ولا الأحرار طلب وشي خدمة من الاتحاد الاشتراكي.

وهادشي هو لي خلا قياديين من الاتحاد الاشتراكي براسو ما فاهمين والو، وكندوي على اخبار مؤكدة من استياء ؤئيس المجلس الوطني للحزب، ورئيس الفريق البرلماني، وقيادي وازن مكلف بالقطاع النقابي ديال الحزب.

هادو براسهوم معارفين أسباب نزول الهجوم على لقجع، وافتتاحيات الجريدة، وخصوصا الافتتاحية المتعلقة بالتساؤل على واش مزال كاينين إسكوبارات في البام، والافتتاحية ديال عدم استغلال المنتخب سياسيا. وهادا السبب لي خلا لشكر فاش بانلي مكاينش حماس داخل المكتب السياسي لهاد الهجوم، انه ينتقل للجريدة وللأتباع ديالو في السوشل ميديا، بما فيها لي كتخدم بأسماء مستعارة.

والمؤلم ان لشكر كيقزم الاتحاد الاشتراكي لسقف نازل بزاف، وهو يكون رويدة ديال السوكور.

الاتحاد الاشتراكي خاص يفهم انه حزب في المعارضة، والمهمة ديالو ماشي هي يدخل في شبوقات وخلافات الأغلبية، ويحاول يتقرب لفريق على فريق.
مهمتو هو يكشف أخطاء الأغلبية إذا كانت ويقدم البدائل لي كيقترحها.

وإذا بقا فهاد التشلهيب، راه غيفوتوه في الانتخابات الجاية التقدم والاشتراكية والعدالة والتنميةـ لي بالفعل دايرين معارضة شرسة.

راه أسي ادريس نهار غتفشل انتخابيا، ما غيتسوق ليك لا التراكتور ولا الحمامة.