صحاب الطاكسيات الكبار بغاو الزيادة .. ومهني لـ”كود”: المعيشة غلات والمازوط طالع نازل والمصاريف تزادت .

منذ

أميمة عطية – كود كازا ///

رجعات مطالب الزيادة فتعريفة الطاكسيات لكبار للواجهة من جديد، وسط الارتفاع المتواصل فتكاليف المعيشة ومصاريف الصيانة، ولغلا دلمازوط، اللي خلا بزاف من المهنيين كيشوفو أن التعريفة الحالية بين 6دراهم و 7 دراهم لبلاصا ، ما بقاتش كافيا باش تغطي المصاريف اليومية ديالهم.

وفهاد السياق، صرح عدد من مهنيي لقطاع لـ”كود”، أن مراجعة التعريفة ولات ضرورة أكثر من أي وقت فات، مؤكدين أن شوافريا ولاو كيتحملو مصاريف كبيرة، سواء فلمازوط لي ممستقرش أو الصيانة وغيرها من لمصاريف زايدا ولي فوق طاقتهم، مؤكدين على أن لكليان حتا هو تزادو عليه لمصاريف وكلشي ولا مخنوق .

وزاد ضافو لمهنيين ، أن القطاع كيعاني من مجموعة ديال الإكراهات اليومية، داعين إلى فتح حوار جدي مع الجهات المعنية باش اتزاد فتسعيرة تاكسي لبيض فكازا حيت هي اكثر وسيلة كستعملوها لبيضاويين، و كيطالبو بتحسين ظروف لخدمة ديالهم.

وكان مهنيو الطاكسيات الكبار والصغار فالدار البيضاء دارو وقفات احتجاجية مؤخرا و طالبو فيها بالزيادة، في ظل ارتفاع الأسعار.

وللإشارة فقط، فرجعات أسعار النفط العالمية كتعيش على وقع التذبذب ف هاد ليام لخرا، بسبب التوترات الأمنية فالشرق الأوسط، وبالرغم من أن الأسواق العالمية عرفت بعض التراجعات الطفيفة، إلا أن خام برنت بقى قريب من 76 دولاراً للبرميل، بينما استقر خام غرب تكساس فحدود 72 دولاراً للبرميل، وهو ما كيرجع المخاوف من تأثير هاد التطورات على أسعار المحروقات فالمغرب.