كشف تقرير جديد للمندوبية السامية للتخطيط أن المغرب داخل على تحول ديموغرافي كبير فلعقود لي جايا ، بعدما غادي يعرف ارتفاع غير مسبوق فعدد الناس كبار فالسن، فظل تراجع الخصوبة وتغير أنماط الزواج والإنجاب.

وحسب معطيات تقرير “التوقعات السكانية للمغرب 2024-2060”، فإن عدد المغاربة اللي غادي يكونو فسن 60 عام فما فوق غادي يرتفع من حوالي 5 ملايين شخص سنة 2024 إلى 10.9 ملايين شخص سنة 2060، يعني قرابة 11 مليون شيباني وشيبانية ، وهو ما غادي يمثل حوالي ربع سكان المغرب بنسبة 25.2 في المائة.

ووضح التقرير أن هاد التحول مرتبط بشكل كبير بانخفاض الخصوبة اللي بدا من سنة 1975، وهي المرحلة اللي عرف فيها المغرب بداية التحول الديموغرافي، بعدما بدا معدل لولادة كينقص مقارنة مع العقود السابقة، إلى جانب تراجع الوفيات وارتفاع متوسط العمر.

ومن بين العوامل اللي ساهمات فهاد التحول، كاين تأخر سن الزواج، وتغير اختيارات الأسر فعدد الأطفال، إضافة إلى التحولات الاجتماعية والاقتصادية اللي عرفها المجتمع المغربي خلال السنوات الأخيرة.

وشار التقرير إلى أن الأجيال اللي تزادت ابتداءً من سنة 1975 غادي تدخل تدريجياً لمرحلة الشيخوخة ابتداءً من سنة 2035، وهو الشي اللي غادي يزيد يسرع ارتفاع عدد ناس لكبار فلعمر فالمغرب.

كما توقع المصدر نفسو ، أن عدد الأشخاص اللي عندهم 70 عام فما فوق غادي يزيد من 2.06 مليون شخص سنة 2024 إلى 6.3 ملايين شخص سنة 2060، أي بأكثر من ثلاث مرات.

وبحسب المعطيات نفسها، غادي تكون الشيخوخة أكثر حضوراً فالمدن، حيث غادي يرتفع عدد المسنين فالوسط الحضري من 3.18 ملايين سنة 2024 إلى 8.06 ملايين سنة 2060، مقابل ارتفاع أقل فالوسط القروي.

وكيعتبر التقرير أن هاد التحول الديموغرافي غادي يفرض تحديات كبيرة على المغرب، خصوصاً فمجالات التقاعد، والرعاية الصحية، والتكفل بالأشخاص اللي غادي يحتاجو مواكبة طويلة الأمد، وهو ما غادي يفرض التفكير فإصلاحات جديدة للحفاظ على التوازن بين الأجيال.