سكوب. تفاصيل مثيرة على عميد شرطة "الوهمي". استغل عطف الوالي السابق ومراتو باش ينصب وها التهم باش تعتاقل .

مصدر الصورة

عمر المزين – كود///

اليوم لخميس 9 يوليوز 2026 حالت عناصر الفرقة الجهوية للشرطة القضائية بمدينة فاس، على النيابة العامة المختصة، واحد الشخص قصتو تستحق تتحول لفيلم. هادا انتاحل صفة كوميسير بالمفتشية العامة التابعة للمديرية العامة للأمن الوطني بالرباط.

حسب معلومات “كود” النيابة العامة قررات بعد استنطاق المتهم متابعتو في حالة اعتقال احتياطي. التهم: “تعدد جنح النصب، انتحال مهنة ينظمها القانون، استغلال النفوذ، المشاركة في إفشاء السر المهني، التزي بغير حق بشارة رسمية، الشذوذ الجنسي”.

واعترف المتهم “أسامة.م” حسب مصادر “كود”، بانتحالو صفة عميد شرطة ممتاز بالمفتشية العامة للأمن الوطني. كان كيوهم الناس وحتى اللي خدامين فالبوليس فوزان وطنجة باللي يقدر يتوسط ليهم ولكن خاصو ياكل: فلوس او كادوات

المتهم ما حسمش وقال باللي الدافع هو حبو لمهنة الشرطة وباللي كان كيعاملو باش كان وليد صغيور، والي الأمن السابق عبد الحق عديلي المدير السابق لمؤسسة الأعمال الاجتماعية بالمديرية العامة. كان هاد الاخير كيزور المركز الاجتماعي دار الأطفال وزان مع مراتو جميلة خدي اللي كانت خدامة فالاولى تضيف مصادر “كود”.

العميد المزور قال باللي علاقتو توطدات بعبد الحق عديلي ومراتو. مرة مرة كيزورهم فدارهم بوزان. تماك كانو يدورو معاه ويعاونوه. باش خدا الباك ف2014 ما بقاش ساكن فالمؤسسة الاجتماعية ومشى لكلية الحقوق شعبة القانون بالعربي، بجامعة محمد الخامس بالرباط. سكن فالحي الجامعي وخذا ديبلوم الدراسات الجامعية العامة

فالرباط بقى يزور الوالي عديلي وتزاد تعجب بوظائف البوليس. بغى يدخل للشرطة، تقدم ف2018 للكونكور ديال البوليس وترفض حقاش كان قصير

بعد ما رفضوه قرر، تضيف مصادر “كود”، ينتاحل صفة عميد شرطة ممتاز بالمفتشية العامة للأمن الوطني. كان مسكون بالبوليس. كيزور الابواب المفتوحة سوا ففاس او الرباط او مراكش، عارف كلشي على الأقسام والمصالح التابعة للمفتشية العامة وجمع خبيرات كثيرة على هاد المديرية

واخا خدم فمكتب ديال المحاماة بقى مسكون بالبوليس. دار لراسو لوحة تعريفية وسمى راسو اسامة عديلي وكان كيقول باللي عبد الحق عديلي عمو. بقى حتى جاب الربحة