محطة ولاد زيان فكازا.. مشروع بأزيد من 10 مليار ووعود بقرب الافتتاح.. الأشغال مازال ما سالاتش والزبل داير بالمحطة ما كيعكسش صورة لمدينة متروبولية.. شكون مسؤول على التأخير؟ .

أميمة عطية – كود كازا ///

كيتواصل الجدل حول مشروع إعادة تهيئة المحطة الطرقية ولاد زيان بمدينة الدار البيضاء، خصوصا مع فترة صيف لي كتعرف حركية مهمة في تنقل ديال لمسافرين .

وفي جولة ميدانية دارتها “كود ” في الساعات لولى من صباح التلاثاء ومع 2 صباح “كيبان بوضوح أن الأشغال مازال ما سالاتش، وأن المحطة باقي ما بانتش فيها الملامح النهائية اللي تخليها تكون جاهزة للاستغلال، رغم التصريحات السابقة اللي كانت كتأكد أن الافتتاح غادي يكون في غضون شهرين.

مصدر الصورة

وحسب ما عيناتو ” كود” ، باقين الأشغال ومواد البناء محطوطين داخل عدد من مرافق المحطة، والشيء لي كيبرزط هو انتشار لوسخ وزبل وروائح لخيبا بجنابات المحطة في مشهد ما كينسجمش مع الطموح ديال مدينة بحجم الدار البيضاء، اللي كتقدم راسها كمدينة متروبولية وكتستعد لاستحقاقات كبر.

وهو الوضع اللي كيطرح تساؤلات حول مدى جاهزية المشروع، خصوصا وأن ولاد زيان كتعتبر من أكبر المحطات الطرقية بالمغرب، وكتستقبل يوميا أعداد كبيرة من المسافرين.

مصدر الصورة

وكان مسؤولون من مجلس جماعة الدار البيضاء سبق ليهم وأكدوا، في تصريحات مختلفة ل ” كود” أن المشروع دخل مراحلو الأخيرة ، وأن الهدف هو إخراج محطة عصرية تواكب التحولات اللي كتعيشها العاصمة الاقتصادية، من خلال تحسين الخدمات، واعتماد تجهيزات حديثة، وتنظيم أفضل لحركة النقل.

ولكن بعد مرور أكثر من 4 اشهر على الوعود بقرب الافتتاح، مازال المشروع ما دخلش حيز الخدمة، وبقات التساؤلات مطروحة حول أسباب التأخير، والموعد الحقيقي اللي غادي تكون فيه المحطة جاهزة لاستقبال المسافرين.

هاد الورش، اللي رصدات ليه اعتمادات مالية كتناهز 10 مليارات سنتيم، سبق وخلق نقاش داخل المجالس المنتخبة بسبب حجم الغلاف المالي المخصص ليه، حيث اعتبر عدد من المنتخبين أن هاد المبالغ خاصها تكون مرتبطة بنتائج واضحة على أرض الواقع، وتجاوب مع انتظارات الساكنة.

وفي الوقت اللي كيتقدم فيه مشروع المحطة على أنه جزء من الأوراش اللي خاصها تعطي صورة جديدة على الدار البيضاء كمدينة متروبولية، كيبقى الوضع الحالي بمحيط ولاد زيان بعيد على هاد الطموح، بعدما مازال الزبل والوسخ حاضر فجنبات المحطة.

وماشي غير زبل اللي كيثير الانتباه، حتى الجانب الاجتماعي حاضر بقوة، بعدما باقين عدد من المتشردين كيقضيو الليل فمحيط المحطة وكيباتو فلعرا ، في غياب حلول كافية للإيواء، وهو ما كيزيد يعقد الوضع بمرفق كان خاصو يكون واجهة حضرية للمدينة.

وبين مشروع صرفات عليه الملايير، وخطاب رسمي كيهضر على تطوير العاصمة الاقتصادية والاستعداد لمستقبل حضري جديد، كيبقى السؤال مطروح: واش غادي تكون محطة ولاد زيان فعلا في مستوى تطلعات مدينة متروبولية؟