خاص المغرب يستثمر فهاد النوع من السياحة... الأوروبيين كيفضلو البلايص لي كيتعلمو فيها صنعة ولا حرفة ولا لغة جديدة وقت الكونجي .

مصدر الصورة

كود – مراكش//

بين استطلاع دارتو ماستركارد على أكثر من 27 ألف مسافر من 28 دولة أوروبية، باللي “الكونجي د الصنعة” ولا من أكثر توجهات السفر هاد الصيف.

48% من المشاركين قالو باغين يتعلمو شي حاجة جديدة فالعطلة، و42% مستعدين يخلصو أكثر إلى كانت الرحلة غادي تعلمهم شي حرفة، و37% سبق ليهم ريزيرفاو أو كيخططو لهاد النوع ديال السفر.

وحتى القيمة ديال الرحلة تبدلات، حيث 51% قالو بلي تعلم شي حاجة جديدة كيخلي العطلة عندها معنى كثر، و48% كيشوفو أن المهارة اللي كيرجعو بها حسن من أي سوفونير.

أكثر الحوايج اللي باغين الأوروبيين يتعلموها هي اللغات، والطياب مع شيفان ولاد البلاد، واليوغا، والحرف التقليدية بحال الطين والنجارة والخياطة، عاد التصوير والرسم والرياضات، جيل زد هو أكثر فئة متحمسة لهاد التوجه، اللي كيشجع حتى على زيارة المدن الصغيرة والقرى عوض الوجهات السياحية المعروفة.

هاد التوجه يقدر يكون فرصة ذهبية حتى للمغرب، اللي عندو جميع المقومات باش يولي يخدم على “عطلات المهارات”، فالصناعة التقليدية المغربية، بحال الزليج والفخار والزرابي والنقش على الخشب وصناعة الجلد لي ممكن يوليو ورشات حية كيتعلم فيها السائح الحرفة بيديه، وما يبقاش غير كيشري المنتوج واجد.

وزيد عليها الكوزينة المغربية، اللي تقدر تجيب الزوار كثر بدروس فالطاجين والكسكس والحلويات وصناعة الخبز وأتاي، وحتى تعلم الدارجة أو الأمازيغية، كلها تجارب مطلوبة عند بزاف ديال السياح.

الاستثمار كثر فهاد النوع من السياحة غادي ينفع الحرفيين، وينشط الفيلاجات والمدن الصغيرة، ويخلي المغرب يبيع تجربة متكاملة، ماشي غير إقامة وفنادق وزيارات سياحية.