علمت “كود” من مصدر موثوق، بلي المؤثر لي زعج وبرزط وديرونجا أم نجم المنتخب المغربي فالمونديال، اسماعيل الصابيري، هو مؤثر عندو سوابق ف التقلاز تحت الجلابة وفالمارشيات الغريبة وكيتعلق الأمر بصابر الشاوني.

هاد المؤثر، حسب معلومات “گود”، زعج بزاف وبرزط عائلة اللاعب الصابري، بالاضافة الى لاعبين ومقربين منهم.

هاد التافه لي مقاريش وكيعرف غير يقلد ويشطح ومكيعرفش حتى يكتب، وللي خاج من القرايا من الابتدائي، بلاصت ما يعاود يقرا ويتربى على قيم تربوية وتعليمية واجتماعية، ناض دار فضيحة بهاد السلوك المزعج.

الغريب، كيقدم راسو، بلي محاور، اي كينتحل صفة الصحافة للي كادير الحوارات، وضسر على عائلة الصابري، للي خرجات كتبرأ من الموثرين.

هاد الشاوني، للي سبق فرشاتو كود، فمقالات سابقة خصوصا بعدما تسربات معطيات بلي خدام مع المكتب الوطني للسياحة، كيدير الاشهار عن مارشي تفتح باسم شركة معينة، راه خدام كذلك مع بنكة مغربية وشركة كلير. شفتو على نيفو، هاد نوع مكيهموش المنتخب بقدر ما يهمو غير الارباح ويقنع الشركات يعطيوه اشهارات.

مثلا ف المكتب الوطني للسياحة، كانت فضيحة فاش طلق مارشيات بالملاييير بهدف التسويق للسياحة المغربية داخليا وخارجيا، وذلك بالاستعانة بصناع محتوى وانتاج فيديوهات على منصات التواصل الاجتماعي. ودار هاد المكتب الوطني للسياحة صفقة مباشرة مع مؤثر مكيعرفش يهضر وسبق عطا أمر بالميكرو وبالصوت والصورة لمسؤول فالداخلية باش يجيب الماء لشي لعابة فمباراة احتفالية عادية فالشمال.

يشار بلي أكرم الصيباري خو الدولي المغربي إسماعيل الصايباري تفرگع على المؤثرين اللي كايمشيو للتيران فماتشات المنتخب المغربي فهاد المونديال فميريكان وكندا والمكسيك، وباغيين يستغلو عائلات اللاعبين باش يجيبو المشاهدات.
وخرج خو اسماعيل الصايباري فسطوري على انستغرام، وعبر على الغضب ديالو من المؤثرين اللي باغيين يرجعو عائلات اللاعبين د المنتخب المغربي كونصيبط يجيبو به المشاهدات، بلا احترام للخصوصيات ديال الناس، وقال: “خليكم فبلاصتكم وما تخلطوش معنا راه بحال ولينا حنا عائلات اللاعبين شي حاجة تجدبو بها بنادم”.

وكمل خو الصايباري، وقال: “إلى بغيتو تهضرو ولا تضحكو ما فيها باس وما كاين حتى مشكل، ولكن خليو مسافة بيناتكم وكونو محترمين وخصوصا مع الأمهات، وما تبقاوش تعنقوهم وتمسوهم وتبوسوهم وتحطو التيليفونات فوجوههم، راه هاد العيالات باغيين غير يشوفو ولادهم لاعبين فالتيران”.