من بعد ما تافقو مع إسبانيا.. الربط البحري ديريكت مع المغرب من جبل طارق سالا .

مصدر الصورة

كود -سبتة //

علنات حكومة جبل طارق، نهار الجمعة 3 يوليوز، أنها غادي توقف خدمة سفن البحرية اللي كانت كتربط بينها وبين المغرب، وهاد القرار جا الاتفاق الجديد مع إسبانيا .

وقالت الحكومة فبلاغ رسمي إن هاد الخط البحري، اللي كانت كتخدمو شركة DFDS، لعب لسنين دور مهم فربط المغرب بمضيق جبل طارق، وساهم فتقوية العلاقات العائلية والثقافية والدينية والاقتصادية بين الجالية المغربية اللي عايشين فجبل طارق وبلادهم.

وضاف البلاغ أن السفينة ما كانتش غير وسيلة ديال النقل، ولكن حتى رمز للصداقة اللي كاينة بين جبل طارق والمغرب، وعلامة على الروابط الإنسانية .

هاد القرار جا من بعد الاتفاق اللي توقع فشهر يونيو 2025 بين بريطانيا والاتحاد الأوروبي وإسبانيا بخصوص جبل طارق، باش تلغا الحدود بين جبل طارق وإسبانيا، ويسهال تنقل البشر والسلعة بلا المراقبة الروتينية اللي كانت من قبل.

وبموجب الاتفاق الجديد، ولات قواعد فضاء شنغن كتطبق فميناء ومطار جبل طارق، كما غادي يتدار اتحاد جمركي بين جبل طارق والاتحاد الأوروبي باش تسهال حركة التجارة والعمال اللي كيدوزو الحدود يومياً
.
أما بالنسبة للمسافرين اللي جايين من دول خارج الاتحاد الأوروبي، بحال المغرب، ولى خاصهم يكون عندهم فيزا شنغن قبل ما يدخلو لجبل طارق من إسبانيا.

وبسبب هاد التغييرات القانونية، ما بقاش ممكن تبقا خدمة مباشرة بين جبل طارق والمغرب، حيث استقبال مسافرين جايين من دولة خارج الاتحاد الأوروبي بلا شنغن ولى ما كيتوافقش مع القوانين الجديدة.

وحا حبس هاد الخط البحري، مازال المسافرين المغاربة يقدرو يسافرو من العبارات اللي كتمشي من الموانئ الإسبانية القريبة، بحال الخزيرات أو طريفة (Tarifa)، فالاتجاه ديال طنجة أو سبتة.