البارح كان افتتاح الدورة 12 من منتدى حقوق الانسان اللي كيدار على هامش مهرجان كناوة بالصويرة، بندوة على الشباب. سماوها “شباب العالم، الحرية، الهوية، المستقبل”. طبعا كان عامر هدرة اللي فشي شكل فسنة انتخابية هو ان منتجة المهرجان نايلة التازي دارت الطابي روج لوزير الثقافة والاتصال والشباب محمد مهدي بنسعيد. اييه جابتو يتبورد.
وزير الترفيه اللي ما عندو حتى مشروع ثقافي ولا تصور لشي سياسة ثقافية فالبلاد، لقاها فرصة يدير حملة انتخابية ديالو. بدا يطلق فالكلام وصافي. قاليك يا سيدي باللي حزبو فتح الباب للشباب للعمل السياسي وباللي خاص وجوه جديدة. نطبقو كلامو على كازا. جهة كازا اكبر جهات المملكة فالسكان. شكون امينها الجهوي. ملايري ما قاريش مول لفروماج بن الضو عبد الرحيم. هادا اللي كان تسحب ليه الباسبور وتغلقات عليه الحدود على قضية مازال تابعاه حتى اليوم. ها البام الحقيقي كيفاش يخدم ماشي كلام بنسعيد لنخبة فيها اجانب ما عارفينش خروب بلادنا.

بنسعيد قال ليك وزارتو عطات فرصة للشباب باش يحلم. شفنا فسنوات بنسعيد على الوزارة احلام هاد الشباب خاصة جيل زيد. شفنا شحال حالم هاد الجيل. كلشي كيكذب هاد لكلام ديال الوزير

هدر على الالعاب الالكترونية بلا ما يجبد شكون كياخد المارشيات وعلاش مريم ابيدزير مولات افان سين ديما واخدة المارشيات. ما هدرش على مارشيات كيعطيهم لصحابو بحال هاداك اللي هرب للخاريج كاع واسمو بناني سميرس وعندو “كلير امبولس” و”كليماكس” وووو.

هدر على صناعة السيارات بلا ما يجبد لفضيحة ديال طونوبيلة تشفر تصميمها من تونس واللي حتى هي شافراه من الصين. المشروع اللي شريك فيه بنسعيد مع شي حد اسمو بلخياط تقدم لسيدنا. شوفو شحال داز ديال الوقت وما كاين والو.

المهم التازي باغية تكون بامية قبل من البام وعطات لهاد لوزير فين يهدر وحتى حد ما واجهو بفضايح وامور كثيرة. حتى واحد ما قال ليه علاش داير شراكات بالملاين مع شي صحف وعلاش شي صحف الكترونية كتاخذ الدعم بلا توفر جميع الشروط وعلاش وعلاش.