أوروبا كلها تبنات الحرف اللاتيني الروماني في الكتابة، لأنها كانت جزء من اهم حضارة عرفاتها البشرية، والمغرب والامازيغ كانو جزء منها أيضا، ولكن نهار بغاو حرف للغتهم ناضو كيقلبو في الصحراء، واش كاين شي حاجة فيها الربح كتجي من الصحرا راه انا جاي منها، جابو حرف امازيغي يصلح للزينة والرمزية أكثر منه للكتابة بحكم انه خاصك تبدى معاه من الزيرو تقريبا، وبذاك حكموا على لغتهم بالموت، عوض يتبناو الحرف اللاتيني لي تقريبا العالم يمكن ليه يقراه ويفهم وينطق الأصوات لي كيرمز ليها، وبهذا كانت تكون الامازيغية لغة مقروئة على الأقل في أرضها واخا ممفهوماش هانية الفهامة تجي من بعد.

الموشكيل فاش كتعبر على هاد الرأي البديهي والمنطقي كتبان بحال الى كفرتي بالقضية والجينات والهوية، بينما في الواقع راه لي خرجوا على القضية وقبروها وردموها في التاريخ هوما لي قرروا اعتماد حرف تيفيناغ، هو كيجي زوين كرمز ولكن عمليا باش تبدى تتعلم لغة خاصك تتعلم حرفها هو اللول وهنا زدتي عليك الخدمة، بينما كون كانت مكتوبة بالحرف اللاتيني على الأقل غادي تقدر تقراها ومع المدة غادي تلقط كلمات وفي نفس الوقت راه أهم حرف لغوي في العالم، حرف الإمبراطورية الرومانية والحرف لي كتكتب بيه أوروبا والامريكيتين، وحتى لي ممعتامدينوش في لغتهم راه كيقراوهزفي المدرسة كلغة تانية.

كنظن خاص المعهد الملكي للثقافة الامازيغية يخرج بإعتذار علني لأنه ساهم في قتل اللغة الامازيغية للابد بإعتماده حرف تيفيناغ، حيت واه خاص تكون واكل الفصة باش تبغي تحيي لغة تعتامد ليها حرف قديم مكاينش بيه منتوج كثير وماشي منتشر ومكيقراه حتى واحد، وحاليا راه غير هدر ديال المال العام اعتماده في اللوحات والبلايك، كون كان حرف لاتيني راه أي واحد محارب الأمية على الأقل غادي يتهجاها، دابا بنادم كيشوف فيها بحال كي كيشوف في بلاكة مكتوبة بالشينوية، راه كاين لغات قديمة في أوروبا باقا عايشة بسباب الحرف اللاتيني بحال الرومانشية في سويسرا كيهدرو بيها اقلية ولكن على الأقل راه غادي يقراوها حتى لي عندهم التعليم الابتدائي في المغرب، دابا من بعد شلا خسران ديال الفلوس ومحاولات وتدريس گاع وباقا واقفة في بلاصتها وماواصلاش باش تكون لغة تعبير على هوية المغاربة الامازيغية.