عرفات عدد من القهاوي بكازا وخصوصاً فالمدينة وبعض الأحياء المجاورة، المعاريف، بوركون زيادات طفيفة فثمن القهوة تزامناً مع الإقبال الكبير اللي كتعرفو خلال مباريات المنتخب الوطني المغربي فمونديال 2026.

وحسب ما عايناتو “كود”، ارتفع ثمن قهوة “نورمال” فأحد القهاوي فالمدينة بجوج دراهم، بحيت كان الثمن ديالها كيدور فحدود 16 درهم وولا 18 درهم خلال هاد الفترة.

وفي المقابل، بقات الأثمنة مستقرة فعدد من الأحياء، من بينها عين السبع والبرنوصي، بحيت ما تسجل حتى تغيير فثمن القهوة وبقات الطريفة كيفما هي معروفة عند الزبائن.

وفهاد السياق، وفي تصريح لـ”كود”، وضح مهني يشتغل فالقطاع أن هاد الزيادة لي كتعرفها القهوة لي كيشرف عليها ما عندها حتى علاقة بماتشات المونديال أو بمحاولة استغلال الإقبال الكبير، مؤكداً أن الهدف منها هو الحد من الزحام داخل القهوة، ومن الفوضى..

وكال المتحدث نفسو: “زدنا جوج دراهم فالقهوة باش ما يدخلوش هركاوة يتفرجو، وتبقى القهوة نقية ومنظمة والناس اللي جاية تتفرج تلقى راحتها”.

ومن جهة أخرى، عبر أحد المواطنين فحديثو مع “كود” على الاستغراب ديالو من هاد الزيادات اللي تزامنات مع الماتشات، معتبراً أن أي تغيير فالأثمنة فهاد المناسبات كيبقى موضوع خاصو يتناقش بين الزبائن وأصحاب القهاوي، واتعلم لكليان به وبالدوافع ديالو خاصة مع الإقبال الكبير اللي كتعرفو هاد الفضاءات فهاد الفترات.

وللإشارة فقط القهاوي فكازا، وفمدن أخرى بالمغرب كتعيش حركية استثنائية بسبب التظاهرة الرياضية الكبيرة لكيعرفها العالم وخاصة مع تواجد المنتخب المغربي، فمونديال 2026 بحيت كتولي وجهة مفضلة عند عدد كبير من المشجعين الراغبين فمتابعة الماتشات وسط أجواء جماعية وحماسية.