واش أكل كلب جريمة ضد الإسلام، راه غير انا غادي نكون واكل شي ستة دالكلاب كفتة وصوصيط في المواسم والسواق، وزايدون ديننا الإسلام الحنيف أكبر وأعظم من أن يسيئ اليه بنسنس حيت كلى كلب، وممحتاجش النيابة العامة تتدخل وتحميه .

مصدر الصورة

محمد سقراط-كود///

واش أكل كلب جريمة ضد الإسلام، راه غير انا غادي نكون واكل شي ستة دالكلاب كفتة وصوصيط في المواسم والسواق، على كاين شي نص خبزة فيه الكفتة بخمسة دراهم، وزايدون ديننا الإسلام الحنيف أكبر وأعظم من أن يسيئ اليه بنسنس حيت كلى كلب، وممحتاجش النيابة العامة تتدخل وتحميه من إسائة بنسنس أو أي واحد آخر، وكيما قال جد الرسول صلى الله عليه وسلم لأبرهة الحبشي فاش بغى يهدم الكعبة ( لهذا البيت رب يحميه)، راه هادشي لي خاص تدير النيابة العامة والقانون والمشرع المغربي ويقولوا بصوت واحد لهذا الدين العظيم رب يحميه، أما تنوض النيابة العامة تابع واحد كلى كلب بالاسائة لدين الإسلامي راه هذا نوع من محاكم التفتيش.

كاين الدول لي كتاكل الكلاب تاريخيا بحال كوريا ومناطقدفيدالصين ومع دخول الحضارة الغربية لعندهم وقفوا هاد العادة ومنعوها قانونيا، وكاين دول بحال لي في أوروبا الكلب عندهم رفيق وصديق منذ قديم الزمان، كاين تماتيل رومانية ديال الكلاب وأطفال كيلعبو مع الكلاب، هاعلاش فرنسا مثلا كتعاقب بالحبس على قتل واكل الكلاب، وكتمنع من بعد من تملك أي حيوان او تخدم فشي خدمة عندها علاقة بالحيوانات، وكذلك في اسبانيا كاين الحبس وغرامات تقيلة وتشمل الحيوانات بصفة عامة، ولكن حنا ماهادو ماهادوك، حنا بلاد عامرة كلاب مشردة وعادي يضربهم بنادم وهو غادي يشير على كلب بحجرة، ومرة مرة كتنوض حملات قتل جماعي للكلاب منظمة من طرف الجماعات، وبالاظافة الى انه نجس عند اغلب الناس الكبار ومن نواقض الوضوء، وعلاقتنا معاهم كشعب عمرها كانت نفس علاقة الانسان الغربي مع الكلاب عموما، علاقتنا معاهم نفعية وخاصهم يبررو وجودهم من اجل شوية ديالزالخبز فازگ، بينما لوحات عصر النهضة في أوروبا بزاف منها مزينة بالكلاب لي وصف الترف والنخوة والارستقراطية والبذخ .

التمدن والحضارة والرفق بالحيوان راه پاك فيه كولشي وكيتخاد كامل ماشي طرف بطرف، كيمشيو معاه حتى الحريات الفردية والعامة والديمقراطية والمحاسبة، بنسنس إلى المحكمة لقاتوا بصح قتل كلب وكلاه يتعاقب لإيذائه حيوان، آش دخل الدين الإسلامي في هادشي، بالمنطق الديني راه مليون حاجة كنديروها في النهار مسيئة للدين الإسلامي وگاع الأديان، على تهرگاويت لي طاغية في الفضاء العام المغربي ماشي مسيئة للدين حتى هي، وحاجة خرى علاش يتابع في حالة اعتقال واش قاتل بنادم، كيفاش وزير العدل ومندوبية السجون ديما كيتشكاو من الاكتظاظ والمتابعة في حالة اعتقال، بينما النيابة العامة غير لي وقف حداها تسيفطو ياكل العدس، واش جريمة بنسنس ديال كلى كلب تستاحق المتابعة في حالة اعتقال، طبعا لا في نظري الخاص الغير ملزم، يوتوبر من اشهر صناع المحتوى في المغرب راه باين ومعروف فين مامشى، كاين فرق كبير بين الخطاب والتطبيق.