هاد قصة ياسين شيفور "إن درايف" للي قتلوه وحرقوه. بدات بمحاولة شفرة وسالات ب9 متهمين منهم 2 عيالات .

مصدر الصورة

أميمة عطية كود كازا ///

فهاد الأيام لخرا ، قضية مقتل ياسين، الشاب اللي كان كيخدم شيفور عبر تطبيق “إن درايف”، شدات اهتمام الرأي العام المغربي بسبب الطريقة البشعة اللي وقعات بها الجريمة.

التفاصيل اللي كتخرج كل مرة كتزيد صدمة وكتعطي صورة على خطورة الواقعة وكيفاش الأحداث تطورات بسرعة من مجرد سرقة لجريمة قتل وما تلاها من محاولات لإخفاء آثارها.

حسب معلومات المتوفرة وحسب خرجات إعلامية وتصريحات لعبد الرحيم حكم، محامي أسرة الضحية، القضية فيها 9 دالأشخاص: 7 ذكور و2 عيالات. هادو هما اللي لحد الان تمت متابعتهم بتهم مختلفة حسب درجة تورط كل واحد في الجريمة، منها القتل العمد، الاختطاف، السرقة الموصوفة، التمثيل بالجثة، إخفاء معالم الجريمة، المشاركة فالقتل والسرقة، وعدم تقديم المساعدة لشخص فخطر، وحتى عدم التبليغ عن الجريمة.

وحسب ما صرح به محامي اسرة الضحية، فياسين كان كيخدم بشكل عادي على تطبيق “إن درايف” بطونوبيل رونو كليو، قبل ما يتوصل بطلب نقل من سيدة، وملي وصل للمكان، ركبات معاه هي ورجل آخر كان معاها. هاد الاخير قال ليه ما يقدرش يبرك القدام حيث ضاراه رجلو ورجع للاور.

حسب رواية المحامي، بدات الرحلة، واللي برك اللاور جبد حبل وهو يخنق بيه ياسين. الهدف ما كانش القتل كيف قال المحامي ولكن الشفرة. بغاو ياخذو ليه الطونوبيلة والتلفون وسنسلة الذهب اللي عندو. ما شفروهش بل قتلوه ونقلوه لبزافت لبلايص وحاولو يخفيو جريمتهم البشعة.

هاد المجرم القاتل دار فعلتو ومشى لكازا وتواصل مع صحابو ومعارفو وحتى افراد عائلتو. هادو عرفو اش وقع وما خبروش البوليس عليها متابعين بتهم مرتبطة بعدم التبليغ وعدم تقديم المساعدة.

تعميق البحث غادي يكشف لينا تفاصيل اخرى على عملية القتل وعلى حرق الجثة. المتهم كان باغي يتحمل المسؤولية بوحدو فجريمة بشعة، لكن تناقض اقوالو مع المعطيات كترجح احتمال وجود مساعدين.

قاضي التحقيق دخل 6 من المتهمين لعكاشة. 3 خراين منهم مرا مازال ما تخادش فحقهم قرار