محامي بعيوي: إلا كان المالي حمق خاص للي سمع ليه يكون بعقلو وثروة موكلي من صفقات عمومية وما عندها علاقة بالمخدرات .

مصدر الصورة

أميمة عطية كود كازا ///

كمل اليوم الخميس 4 يونيو 2026 محمد كروط، دفاع عبد النبي بعيوي المتابع فقضية اسكوبار الصحرا، اليوم فجلسة جديدة من المحاكمة، عرض مرافعتو باستئنافية كازا بالتركيز على على الجانب المالي والعقاري لموكلو.

اكد باللي جميع المعاملات اللي دارها بعيوي كانت قانونية ومثبتة بالوثائق والأدلة البنكية، عكس الادعاءات اللي وردات فتصريحات الحاج ابن إبراهيم الملقب بـ”المالي”.

لمحامي محمد كروط شدد أمام المحكمة باللي المعاملات العقارية اللي كانت موضوع الاتهامات ما كانتش مجرد تصريحات شفوية، وإنما معاملات موثقة ومؤداة عبر شيكات بنكية، مؤكداً أن الحقيقة الثابتة فالملف كتخالف الاتهامات الموجهة لموكله.

وبخصوص الشقق اللي تحدث عليها “المالي”، وضح كروط أن هاد بارطمات تشرات قبل ما يتعرف أصلاً على عبد النبي بعيوي، وقدم للمحكمة وثائق وكشوفات حسابات بنكية تبين كيفية أداء ثمن العقار بواسطة شيكات، نافياً بذلك رواية النيابة العامة وتصريحات “المالي”.

وزاد الدفاع وقال باللي سميرة المسعودي، بصفتها مديرة الشركة المعنية، قدمت كافة الوثائق والأدلة لكتبين أن المبالغ المالية الخاصة بهاد المعاملات دخلت إلى حسابات الشركة عبر شيكات قانونية، مؤكداً أن قطاع العقار بالمغرب يخضع لقوانين صارمة تجعل جميع العمليات موثقة وقابلة للتتبع.

وبخصوص لفيلا الشهيرة فهاد الملف، كال كروط أن “المالي” إلا كان حمق و كيكدب خاص اللي يسمع ليك يكون عاقل، حيت التصريحات المتعلقة بقيمة الفيلا شهدت تناقضات كبيرة. فاللول كانت هدرة باللي تباعت ب 3 مليارات و300 مليون سنتيم، وجات لطيفة رأفت، حسب ما جاء في الملف، وقالت باللي الفيلا كانت مهجورة وما بغاتش تسكن فيها.

وتوقف الدفاع عند قضية هشام الوافي، وكال أن هاد الأخير هو من للي باع المالي الفيلا ولكن فشهادتو كال بلي مكيعرفش لمالي وعمرو شافو ، وزاد كال ان لمالي فاش شافو كالو ” حشمت نغرقك ونزيدك حتا زطلة.