مور بورتري وتقرير "كود" من الخزيرات.. قضية هجرة الشوافرية المغاربة لأوروبا وصلت للبرلمان والمستشار الوفا طلب من وزير النقل تقييم للظاهرة ويجيب حلول لوقف نزيف الهجرة .

مصدر الصورة

كود الرباط//

قضية نزيف هجرة السائقين المهنيين المغاربة (الشوافرية) نحو الدول الأوروبية، لي كانت “كود” سباقة لفتح الملف ديالها ونشر تفاصيل مثيرة عليها، وصلات لقبة البرلمان.

هاد الهجرة لي كتهدد قطاع النقل واللوجستيك بالمغرب بالسكتة القلبية، دفع فريق الأصالة والمعاصرة بمجلس المستشارين يدخل على الخط ويوجه سؤال شفهي لوزير النقل واللوجستيك، عبد الصمد قيوح.

المستشار البرلماني عبد الرحمان الوفا، عن فريق “البام”، حط سؤال رسمي بتاريخ 1 يونيو 2026، موجه لوزير النقل، كيتساءل فيه على هاد الظاهرة لي غادا وكتكبر، ولي كتعرف مغادرة مئات الشوافرية الكبار دياولنا لبلدان أوروبا، مستغلين التسهيلات الجديدة المتعلقة بمعادلة رخص السياقة المهنية وعقود العمل الدولية.

الوفا نبه فالسؤال ديالو باللي قطاع النقل الطرقي فالمغرب كيشهد مؤخراً هجرة متزايدة وملحوظة ديال الكفاءات المهنية نحو شركات النقل واللوجستيك الأجنبية، لي كتقدم ليهم إغراءات مالية وتحفيزات اجتماعية وظروف عمل حسن بالمقارنة مع داكشي لي كيعيشوه فالمغرب.

البرلماني حط صبعو على الجرح، وربط هاد الهروب الجماعي للشوافرية بالوضعية المزرية لي كيعانيو منها داخل أرض الوطن؛ وعلى رأسها الحكرة المتكررة، ظروف العمل الصعيبة، ساعات السياقة الطويلة لي كتهدد الصحة، هزالة الأجور، والسرقة والإكراهات المهنية لي كتواجههم يومياً فالمنصات اللوجستيكية والموانئ الكبرى (بحال ميناء طنجة المتوسط).

وزاد حذر باللي هاد “النزيف المهني” كيهدد القطاع الوطني بخصاص مهول فالموارد البشرية المؤهلة، خصوصاً وأن تكوين هاد الشوافرية كيطالب ميزانيات واستثمارات وجهود كبيرة من الدولة.

هاد التحرك البرلماني جا مباشرة من بعد الملف للي دارت “كود” فمقالات سابقة.

“كود” كانت نشرات بورتري مؤثر وصادم تحت عنوان من حكرة الطرد التعسفي بطنجة ميد للتأقل في السياقة الدولية بأوربا…”*، لي كشف وجه الحكرة والمعاناة لي كيعيشوها السائقين المغاربة مع الشركات، وكيفاش الطرد التعسفي والظلم كيكون هو الدافع الأول باش “الشيفور” يقلب على الهروب بأي ثمن لأوربا فين يلقى كرامتو وقيمتو.

كما كشفات “كود” فمقال آخر ومثير تفاصيل هاد الهجرة المنظمة تحت عنوان “هجرة الشوافرية.. رجل الظل صدوقي استقطب مئات الشوافرية”، وضحنا فيه خيوط الهجرة وكيفاش شركات أجنبية و”رجال ظل” كيدخلوا على الخط لاستقطاب الكفاءات المغربية الجاهزة لي هربانة من “الجحيم اليومي” ديال الطرقان والموانئ فالمغرب نحو الفردوس الأوروبي لي كيعاني حتى هو من خصاص مهول.

البرلماني الوفا طالب فالأخير من وزير النقل واللوجستيك، باش يعطي تقييم حقيقي ديال الوزارة لهاد الظاهرة، ويكشف على الإجراءات والتدابير لي ناوي يديرها باش يحسن الأوضاع المهنية والاجتماعية لهاد الفئة، ويعزز جاذبية القطاع وطنيا باش نحافظوا على كفاءاتنا قبل ما يخويو البلاد.