أخصائية د التغذية لـ"كود": ماشي كل نهار ناكلو اللحم.. والمغاربة خاصهم يكثرو من الخضر والديسير باش ما يغلاضوش وما يمرضوش من ورا العيد .

منذ

أميمة عطية – كود كازا ///

مع دخولنا لليوم الرابع من عيد لكبير، كتبقى لماكلة ديال اللحوم وزرود وشهيوات من أكثر العادات المنتشرة عند المغاربة، وهو الشي اللي كيطرح تحديات صحية مرتبطة بالهضم وزيادة الوزن، وحتى مشاكل بنسبة لمرضى ديال سكر .

مصدر الصورة

وفهاد السياق، وفي تصريح ل ” كود” كالت البروفيسور أسماء زريول، أخصائية في التغذية، باللي الحفاظ على الصحة فهاد أيام العيد كيبدا من الطريقة الصحيحة ديال التعامل مع اللحم، موضحة أن اللحم خاصو يتجمد بطريقة منظمة وما يتكدش فوق بعضياتو داخل لفريكو ، مع استعمال ميكات اولا علب مخصصة للمواد الغذائية باش تبقى الجودة ديالو مزيانة.

وزادت زريول أن الكفتة خاصها عناية أكثر مقارنة مع قطع اللحم العادية، حيت كتكون أكثر عرضة باش تخسر بزربا إلا ما تحفظاتش فظروف صحية مناسبة.

وبخصوص النظام الغذائي، نصحات أخصائية التغذية المغاربة بالاعتدال فاستهلاك اللحوم، مؤكدة أن المائدة اليومية خاصها تضم الخضر والفواكه ومصادر أخرى للتغذية، وما يكونش اللحم هو المكون الرئيسي كل نهار، لأن الإفراط فيه يقدر يسبب مشاكل فالهضم والشعور بالثقل.

وزادت دعت زريول المصابين بداء السكري باش اردو لبال أكثر فهاد أيام العيد، واتجنبو اياكلو لحم لغنمي والوجبات الدسمة، مع احترام التوازن الغذائي والمتابعة الطبية المعتادة.

وأكدت لمتحدثة نفسها أن الاستمتاع بأجواء العيد ما كيعنيش التخلي عن العادات الصحية، وأن الاعتدال فالأكل، والإكثار من شرب الماء، و الخضر والفواكه، كيبقاو من أهم الخطوات باش يدوز العيد بلا مضاعفات صحية وبلا زيادة غير مرغوبة فالوزن.