البرلمان خاوي فمناقشة تقرير العدوي: نواب الأمة "مشغولين" بالحوالا وتوزيع المساعدات قبل العيد باش يضمنو الأصوات .

منذ

كود الرباط//

الجلسة الدستورية اليوم الثلاثاء، اللي كانت مخصصة لمناقشة تقرير المجلس الأعلى للحسابات (2024-2025)، عرفت غياب كبير وشوهة للأحزاب الممثلة فالبرلمان. في الوقت اللي خاص النواب يناقشوا فين مشات فلوس الشعب والاختلالات اللي كشفاتها زينب العدوي، رئيسة المجلس فعرض سابق فهاد المؤسسة، قاعة الجلسات العامة كانت شبه خاوية.

حصيلة الحضور كانت هزيلة، فالأغبية حضرو منها يلاه شي 50 برلماني، اما المعارضة حضروا منها تقريباً 26 نائباً.

أما رؤساء الفرق كولشي غبر، من غير أحمد التويزي (البام) وعلال عمراوي (الاستقلال).

الحكومة حتى هي ما مسوقاش، حضر بايتاس، هشام الصابري، والتحق بيهم ميداوي من بعد.

الناس اللي حضروا، فيهم لي شاد تيليفونه كيتكونطا وف اتصالات لضمان التزكية للانتخابات المقبلة، فالوقت لي التقرير فيه “الفضايح” ديال تدبير المال العام مخداش حقو فالنقاش.

حسب مصادر “گود” غياب كثر من 130 برلماني كان لعدة اسباب منها حمى الانتخابات بحيث ان البرلمانيين اللي ضمنوا “التزكية” هبطوا لدوائرهم باش يوزعوا حوالا العيد والمساعدات، باش يضمنو الأصوات من دابا.

من الاسباب كذلك، هو أصحاب التزكيات اللي مازال ما عرف راسو واش غا يترشح، هوما اللي “مرابطين” دابا في الرباط وكيبانوا في الجلسات باش يرضيو عليهم الأحزاب ديالهم.

فالوقت اللي المؤسسة التشريعية خاصها تمارس الرقابة وتربط المسؤولية بالمحاسبة، بزاف ديال النواب فضلوا “حملة انتخابية قبل وقتها” باستغلال حاجة الناس للعيد، وخلاو الكراسي خاوية في أهم محطة لتقييم السياسات العمومية.