علاش معندوش الشجاعة السياسية بحال المنصوري لي خرجات وردات على جبروت.. واش بركة عندو شبهات كثر من فيلا مسعودة وخايف يصدموه بتسريبات جديدة وكيفاش باقي ساكت وهو للي ديما كيهضر على التخليق ومحاربة الفراقشية؟ .

مصدر الصورة

كود الرباط//

الأمين العام لحزب الاستقلال، نزار بركة، اختار أفضل وسيلة للهروب من المساءلة الأخلاقية والسياسية لخطابو “الأخلاقي” ديال محاربة الفساد والفراقشية، وهو الصمت، بعدما خرجات صفحة جبروت وثائق على لافير ديال فيلا مسعودة لي شرا بمليار ف 2022.

بركة وفق مصادر “كود” مبغاش يرد لا بالنفي ولا بالتأكيد ولا يقول واش بصح خلص بالكاش ولا بشي طريقة مشبوهة، عكس زميلتو فالحكومة فاطمة الزهراء المنصوري، المنسقة الوطنية لحزب الأصالة والمعاصرة لي خرجات بتصريح لـ”كود” وقالت بلي ها شنو الممتلكات لي عندها وبلي كاع العمليات لي دارت قانونية. وقالت بلي صرحت بممتلكاتها من 2009، وللي طاري هو تشويه سمعتها.

بركة للي معروف بلي كثر من الكلام ف كل ويكاند وفكل مناسبة أو ندوة، باش يهضر على الفساد المستشري وتفشي البطالة وثقافة الفراقشية فعهد الحكومة، واخا هو عضو فاعل فيها وشاد قطاعات مهمة بحال التجارة والصناعة لي عندها علاقة مباشرة بسلاسل الإنتاج والتوزيع.

وكتبقا تساؤلات منطقية حول فلوس البيعة وشرية واش تخلصات فالمغرب ولا الخارج واش نزار خرج الفلوس فالنوار ولا عند وشي كونط برا ولا دار بحال ياسمينة بادو وعلاش مدخلش معاه مراتو بنت عباس فالملكية .

واش نزار خلص نقدا ويلا خلص نقدا واش حتا هو كان مخبي مليار فالدار ومنين جاتو ويلا كانت ديالو علاش محطهاش فالبنك واش هو كيبيع ويشري باش يكون عندو هاذ المبلغ. مهم فالخلاصة لي خرجات جبروت كيبان قليل مقارنة مع للي كيتروج فالبيت الاستقلالي وكيفاش كيجمعو فلوس الانتخابات واش كاين الكاش بزاف ولا القضية فكاع الاحزاب بحال بحال.

فالمغرب حسب بنك المغرب، فترويج الكاش فبلادنا وصل 513 مليار درهم متم سنة 2025، بزيادة 15.5 في المائة مقارنة بالسنة الماضية. خاص بركة يوضح يلا كان خصلها كاش يكشفها ويلا خلصها عبر مراحل وباتفاق مع البائعة يقولها.