المغاربة غايدوزو صيف بلا عطش ولا انقطاعات لماء.. حقينة السدود وصلت لـ 76% .

مصدر الصورة

كود الرباط//

بعد سنوات من الجفاف والتقشف، الأرقام الرسمية الصادرة اليوم كتحمل أخبار كطمن المغاربة، وقبل من أسابيع من دخول الصيف وصل احتياطي الماء فالسدود لأزيد من 13 مليار متر مكعب.

وكشفت معطيات وزارة التجهيز والماء، لي صدرات اليوم الأحد 10 ماي 2026، على وضعية مائية “استثنائية” ما شافهاش المغرب من مدة طويلة. قبل أسابيع قليلة من دخول فصل الصيف، لي كيعرف ذروة الاستهلاك، نسبة ملء السدود المغربية وصلات لـ 76.24%، وهي قفزة نوعية مقارنة مع نفس الفترة من العام لي فات لي كانت فيها النسبة يالله 40.26%.

المخزون الإجمالي للماء فالمملكة وصل اليوم لـ 13,088.47 مليون متر مكعب*، هاد الرقم كيعني بلي صمام الأمان المائي خدام، وبلي المدن لي كانت مهددة بالعطش غاتقدر تنفس الصعداء هاد الصيف.

التحليل ديال وضعية الأحواض المائية كيبين بلي حوض اللوكوس (92.4%) وحوض سبو (88.2%) وحوض أبي رقراق (91.5%) فقمة العطاء. هادشي كيعني بلي المحور الرابط بين طنجة والدار البيضاء مأمن مائياً بشكل كبير بفضل التساقطات الأخيرة ومشاريع الربط المائي.

حتى حوض أم الربيع، لي كان كيعيش الموت السريري العام لي فات بنسبة ملء كارثية (12%)، قدر اليوم يوصل لـ 65.39%، وهادشي لي كان ناقص فخريطة الما باش يطمأن الوسط والجنوب.

رغم هاد الأرقام مفرحة، إلا “الوفرة لا تعني التبذير”. التدابير لي خدامة عليها الدولة، من تحلية مياه البحر والربط بين الأحواض (لوطوروت ديال الما)، هي لي خلاتنا نوصلو لهاد النتيجة. الصيف كيبقى فترة صعيبة بسبب تبخر الما وارتفاع الطلب، داكشي علاش الحفاظ على هاد المكتسبات كيبقى مسؤولية الجميع.