اش هاد التخربيق اللي كيعيشو أكبر سبيطار فكازا؟ ابن رشد فوضى ومرضى مرميين فالزنقة.. وطبيب من داخل "موريزكو" لـ "كود": الصحة حق دستوري وكنطالبو الوزير التهراوي ايتدخل .

أميمة عطية – كود كازا ///

شنو هاد تخربيق اللي ولى كيتعاش فأكبر سبيطار فقلب المغرب؟ واش بهاد لحالة غادي نستقبلو لعالم وإحنا مرضى السرطان كيتخلاو مرميين فالزنقة؟
“سبيطار ابن رشد” اللي خاصو يكون رمز للعلاج والكرامة، ولى عنوان للفوضى والإهمال والمعاناة اليومية.

مصدر الصورة

علمت “كود” من مصادر خاصة ، أن سيدة جابت راجلها لمريض بالسرطان فالبنكرياس لمستشفى المركز الاستشفائي الجامعي ابن رشد فكازا، هادي يومين ومن بعدما تعدبات باش تدخلو للعلاج، لقات راسها مضطرة تخليه مرمي فزنقة حد سبيطار ، حيت طلبو منها “تيو” طبي وماعندهاش باش تشريه.

السيدة كالت فتصريحات إعلامية لبارح باللي دازو يومين بلا ما ياكلو ولا يشربو، وراجلها ناعس فوق “الباياص” وهو كولو وجع ، وسط تجاهل وصمت صادم، من لمسؤولين .

وفهاد السياق، تواصلنا مع طبيب من داخل سبيطار ، و في تصريح خاص ل ” كود” كال دكتور رشيد شرقاب، طبيب الإنعاش والتخدير وعضو المكتب التنفيذي لنقابة الاتحاد الديمقراطي المغربي للشغل ، أن هاد لحالات كاينين يوميا وكتعاود 4 سنين هادي ، وان الصحة حق دستوري ، وأنهم عياو ما يشكين وحتا دارو شكاية في المنصة جديدة للوزارة وباقين الاختلالات خطيرة .

مصدر الصورة

وعبر شرقاب، على الاستنكار ديالو لهاد الوضع “اللي ولى عادي” داخل السبيطار، وشدد على أن الأطر الصحية كيطالبو منذ مدة وزير الصحة أمين التهراوي يزور المؤسسة ويشوف الواقع بعينيه، لكنه ما جا.

وزاد الطبيب وكال أن الحالة الكارثية ديال “ابن رشد”، وأنه “حشومة ” مريض بسرطان ابقا ناعس فباياص فزنقة وانه خاص ربط لمحاسبة بلمسؤولية ، وان المنتخبين في كازا ومراكز لقرار مقدروش اديرو لجن لمراقبة وحلو هاد لمشاكل.

وأكد شرقاب أن الحديث على الرقمنة وتطوير القطاع الصحي في معرض “جيتيكس” لي أصلا متعرضوش ليه ، وجا ليه وزير الصحة أمين تهراوي فكازا ومادازش أراقب اشنو واقع في سبيطار ابن رشد ماعندو حتى معنى، فوقت مازال المرضى كيتعذبو باش غير يدخلو للسبيطار، وكال بالحرف أن “حشومة مريض بالسرطان يبقى بسيروم فالزنقة”، خصوصاً والمغرب مقبل على تظاهرات عالمية والعالم كامل كيشوف الصورة اللي كنقدموها على قطاع الصحة.

مصدر الصورة

وللإشارة ، كانت نقابة الاتحاد الديمقراطي المغربي للشغل نظمات قبل أسابيع وقفة احتجاجية قدام مستشفى 20 غشت بمشاركة أطباء ومواطنين، احتجاجاً على الاختلالات اللي كيعرفها القطاع الصحي فكازا.

وفي تصريح سابق لـ”كود”، قال مصطفى لكحيل، الأمين العام للنقابة، إن الوضع داخل السبيطار “معروف عند الجميع”، وإن الأطر الصحية كتتعرض للتضييق بسبب نشاطها النقابي ومحاولاتها تخدم المواطن بإخلاص، منتقداً عدم تفاعل وزارة الصحة مع الشكايات اللي كتترفع ليها.

وزادبين المسؤول النقابي مشاكل تجهيزات وأعطاب داخل السبيطار، من بينها أعطال “اللاسانسور” ونقص المعدات والأدوية، مطالباً بربط المسؤولية بالمحاسبة، وداعياً وزير الصحة للنزول شخصياً لكازا وفتح تحقيق فهاد الاختلالات