مركاتو الانتخابات 2026 بسطات: شاعلة فحزب التراكتور بين الجداد والقدام.. واش حرب التزكيات غادي تشتت البام .

مصدر الصورة

مصطفى المزابي -كود سطات//

يعيش حزب الأصالة والمعاصرة بإقليم سطات يامات صعيبة، او يقدرو يتفشو روايض التراكتور لي كان عندو وزن فالإقليم، بعدما تفجر صراع داخلي وصفوه المتتبعين بـ”شد الحبل” بين جوج ديال التيارات الوافد الجديد المدعوم من القيادة الثلاثية وديناصورات الانتخابات المدعومة من القواعد الحزبية المحلية.

وحسب مصادر ديال “كود”، فإن الصراع داير بين الوافدين الجداد اللي دخلو للحزب مؤخرا وباغين يفرضو بلاصتهم فالخريطة السياسة ديال الاقليم عبر استقطابات لوجوه سياسية محروقة، والتيار ديال القدامى اللي متهمين بأنهم باقين شادين مفاتيح القرار وكيتحكمو فتوجيه الاختيارات الانتخابية.

مصادر من البيت الداخلي للبام كتقول باللي “الجداد” جايين بقوة او مراهنين على احد رؤساء الجماعات الترابية الفاشلين لي مقالب على قواعد الحزب بالإقليم باش يعاودو يرسمو موازين القوة داخل التنظيم، فالمقابل، “القدامى” كيعتابرو راسهم هما الضامنين للاستقرار التنظيمي، وهوما اللي شادين خيوط اللعبة من سنين، وكيقررو بشكل كبير شكون يدخل السباق الانتخابي لي جاي وشكون يتقصى منو.

هاد الوضع خلق نقاش حاد داخل قواعد الحزب او خلا أصوات كثيرة ولات كتهضر على “اختلال فتكافؤ الفرص” بالإقليم، وكتقول باللي التزكيات ولات محكومة بمنطق باك صاحبي وهادشي كيغذي الإحساس بالحكرة عند بزاف ديال المناضلين بالإقليم فالمقابل دعات، قيادات محلية للتهدئة وكتطالب بالحفاظ على وحدة الصف، وكتحذر من تحويل الخلافات التنظيمية لصراعات علنية اللي ممكن تضعف موقع الحزب وتخليه يخسر المقعد ديالو فالمعركة الانتخابية التشريعية لي جايا.