سبورتينگ كازا فرقة 100% عيالات نجحت بالعقل عاد الفلوس اللي ضروري منهم وسط مجتمع مأمن ان الكورة غير ديال الرجال .

مصدر الصورة

كود سبور//

مازال كاتعيش فرق كرة القدم د العيالات صعوبات كبيرة، واخا الجامعة الملكية المغربية لكرة القدم راه دايرين مجهودات كبيرة فهاد التخصص، باش حتى لعيالات يحققو نجاحهم فالكورة والدليل هو المنتخب الوطني المغربي النسوي اللي دارت فيها الجامعة ثورة حقيقية فالسنوات الماضية وقدر يحقق نجاحات مهمة، ويكون نموذج للاندية، إضافة إلى فريق الجيش الملكي لكرة القدم النسوي النموذج لقوي فالكورة د السيدات فبلادنا بالإمكانيات المهمة اللي عندو والاهتمام اللي كايلقاه الفريق من إدارة النادي العسكري، ولكن بالمقابل مازال الاندية الأخرى ما عطياش اهتمام كبير للفرق النسوية ديالها، واخا الجامعة فرضت عليهم يكون الفريق النسوي ضروري فكل نادي كرة قدم كايمارس فالقسم الاول من بطولة الرجال.

ووسط هذا الشي بان فريق غير ديال العيالات، ووسط كازا تأسس، ووسط واقع ذكوري صعيب كايشوف ان الذكر اللي من حق يلعب الكورة والأنثى بلاصتها فالكوزينة، فما بالك بتوفير إمكانيات لفريق 100% د العيالات وبادي من الزيرو بعدما تأسس عام 2019، الي هو سبورتينگ الدار البيضا، وقررو المسؤولين عليه يخدمو على الإمكانيات ديالهم وببرنامج واقعي بعيد على داكشي ديال مول الشكارة اللي كايخدمو به فرق الرجال.

وفوقت بزاف ديال الفرق كيتحجّجو بقلّة الفلوس، سبورتينگ قدرو يعطيو نموذج مختلف، وبينو ان قلة الإمكانيات ماشي سبا، ولكن يقدر يكون دافع للإبداع، خاص غير المسؤولين عليه تكون عندهم عقلية حداثية كاتواكب هذا الوقت وكتأمن بحق المرأة تلعب الكورة بحالها بحال الراجل، وهذا الشي اللي كان فالمكتب د النادي برئاسة معاد عكاشة، وقدرو يختارو هوية للفريق، واللي بسرعة ولينا كانشوفوه منافس على البطولة الوطنية ومنافس حتى على دوري أبطال أفريقيا رغم الإمكانيات العادية والبسيطة مقارنة مع اللي عند اندية اخرى، ولكن الفرق كاين فالتدبير.

النجاح ديال سبورتينگ ماشي صدفة، وماشي نتائج عابرة، ولكن جا من خدمة طويلة فالتكوين، وحضور قوي فالفئات الصغرى، اللي قدرو يكونو منبع كيخرج لاعبات باستمرار للفريق الأول، وزيد عليها، الفريق كيتألق حتى فالفوتسال، وكيواجه أندية كبار فكازا بحال الرجاء الرياضي والوداد الرياضي ونصر سيدي مومن، ومع ذلك فرض راسو وولا رقم صعيب.

غير هو هذا النجاح راه خاصو دعم ومساندة، حيث اليد الوحدة راه ما كاتصفقش، خصوصا بالنسبة لفريق ديال العيالات 100% ووسط مجتمع ذكوري، داكشي علاش دعم بحال هاد المشاريع اللي قادرة تعطي فرصة للمرأة انها تفرض راسها وتحقق نجاحات بحال الرجل وتتفوق عليه كاع، راه ولى ضرورة ملحة، وحنا فعام 2026، وبلادنا مقبلة على تنظيم تظاهرات كبيرة بحال مونديال 2030 د الرجال، ومونديال لعيالات، وقدرت تنجح فتنظيم تظاهرات مهمة بحال كاس افريقيا د العيالات جوج مرات والثالثة جاية، راه خاص حتى المستثمرين يزعمو على هذا النوع من الرياضات، خصوصا وان فيه ما يدار وقادرين الاندية ينتجو لاعبات بحال غزلان الشباك وابتسام الجريدي وحنان ايت الحاج اللي يمشيو يحتارفو على برا، والأندية الوطنية تستافد والمنتخبات الوطنية حتى هي تستافد من تطوير إمكانياتهم والخبرة ديالهم.