ما بغاش هشام ايت منة رئيس الوداد الرياضي، يفهم راسو يعطي للفرقة بالتيساع، واخا كان خرج ببلاغ هو والمكتب المديري ديالو اللي عامر بالانتهازيين بحالو، وقالو انهم نارويين يقدمو استقالتهم، ولكن مع اول فرصة بين هشام ايت منة انه ما باغيش يطلق الوداد، وبلي هذاك البلاغ كان غير حيلة باش يمتص غضب الوداديين اللي رفعو فوجهو شعار “ديگاح”.

هشام ايت منة الرئيس الانتهازي اللي كاتهمو غير مصلاحتو ماشي الوداد، حيث ما عمرو ما كان ودادي واللي ما بقاش مشى للتيران ملي شبعو فيه الوداديين سبان وشيرو عليه بالقراعي وهربوه لفيادرا من دونور بعد الخسارة مع يعقوب المنصور، تسنى غير الوداد ربحت اول ماتش بعد شهرين د الخسران، وهو يهز طوموبيلتو ومشى يجري لدونور، ودخل تاني عند اللعابا للفيستيير وهذا الشي ملي سالا ماتش الحمرا ضد الكومديم ضمن الدورة 19 من البطولة، وهذا سلوك كايبين انه إنسان أناني وكاتهمو غير مصلاحتو، وباغي غير الصحافيين يصوروه وهو داخل عند اللعابا باش ما يتنساش، واش كايصحاب لهو جمهور الوداد غادي ينسى له المصايب اللي دار للفرقة فهاد العامين؟ لا راه الوداديين ما غاديش ينساو له هذا الشي.

ايت منة بهاد التصرف المبرهش بين انه صغير فعقلو بزاف، وكايقلب غير على لبوز كيف قالو له وينرز فنفس الماتش، اما شي خدمة وشي القاب الله يجيب، المهم راه ايت منة بهاد الشي اللي كايدير كايستفز الوداديين بزاف، حيث عدد كبير من الجماهير ما بقاوش حاملين يسمعو حتى سميتو، بقى غير يشوفوه داخل خارج مازال عند اللعابا، وراه كايقلب على المشاكل، اللي لا الوداد ولا هو عندهم فين مازال غادي يزيدوها، على المشاكل اللي غرّق فيها الفرقة، هشام خاصو يحضر عقلو ويتمعن مزيان فهاد التصرفات اللي كايدير قبل ما توقع شي كارثة، وخاصو يكون مسؤول ولو غير مرة وحدة فالمسار ديالو الكارثي كمسير فالكورة، ويحط السوار ديال تيران بنجلون ويمشي بحالو، ويخلي شويا ديال الاحترام ما بينو وبين جماهير الوداد.