وفي الوقت لي برلمانات الدول كتناقش الذكاء الاصطناعي، حنا باقي النقاش عندنا واش المرة عندها دماغ بحال الراجل او خاصك جوج عيالات عاد يعطيوك راجل واخا يكون كيشم السيلسيون، وواش يمكن الاجتهاد مع النص أو لا إجتهاد في وجود النص، وباقي النقاش واش العيالات ديال المغرب بحالهم بحال باقي البشر كيولدو على تسعة أشهر، أو راهم يمكن يولدوا حتى على عام كما قال الامام مالك وحسب القانون المغربي، راه حنا مبعادش على أننا نعتابروا أي مرة شدات الدكتورة فشي مجال علمي راه سحارة وعاونوها جنون وخاص نحرقوها، وحتى فاش كيظهر في المغرب شي مصلح متنور بحال وهبي وكيحاول يقنعنا بلي المرة عندها دماغ بحال الراجل ويمكن تشهد في المقاطعة على شي وثيقة، وبلي بلاصة البنت هي المدرسة ماشي الزواج وراه عار باقي السطاشيات عندنا كيتزوجوا وهوما طفلات، طبعا يتم تكفيره وشيطنته وكيتحول لعدو للشعب والأمة ومبعوث شخصي للشيطان باش يخرب هاد الأمة المتطورة المتقدمة بفضل هاد القيم ديال اقصاء المرأة ودخول فش شبوقات الحياة الخاصة للناس.

المغرب كيعيش واحد التلفة مقودة، وبينما دول غير حداه وجات من وراه وترجلات ودارت قطيعة مع الماضي وتوجهات للمستقبل وشدات الطريق ليه ومنها لي وصلات، المغرب باقي حاير وتالف باغي يقلد تجربة قطر في انه ينظم كأس عالم حلال، ولكن في تفس الوقت معندوش فلوس قطر وكلمتها ونفوذها، باغي يدير بحال الصبليون كيلقى النصوص التي ينهل منها للقوانين كتعيق أي انفتاح على الخارج او الداخل، النقاش السياسي باقي فيه بدائي، السونكيلوط لي كانوا شعيبة ديال فرنسا في الثورة الفرنسية عندهم وعي سياسي وجرأة كثر من جامعيين مغاربة عايشين في عصر الانترنيت والذكاء الاصطناعي.

كأس العالم أو تتظيم البطولات العالمية والقارية بصفة عامة مخاصوش يكون غير فرصة إقتصادية بل وإجتماعية وقانونية، وخاصو يكون انتقالة حقيقية في الحقوق والحريات، خاص مغرب ماقبل المونديال مايكونش هو نيت مغرب مابعد المونديال زايد غير التيرانات والترانات، على الأقل مغربيات مابعد المونديال خاص يكونوا كاملات الأهلية ويقدرو يشهدو بحالهم بحال الرجال، ويكونوا محميات في الفضاء العام، ويكون المناخ الاجتماعي أكثر انفتاحا وحرية، ومنبقاوش بلاد كيحاولوا شبابها يهربوا منها واخا يموتوا في البحر، راه هاد الأبجديات ديال العصرنة لي باقي كناقشوها راها عيب وعار على بلاد كتقول على راسها رمز للوسطية وغادا للانفتاح، آشمن انفتاح كاين وباقي طاشمة ديال البوليس والبومبية باغين يفرعوا باب ديال الحديد على واحد حيت مدخل صاحبتوا للدار، من هادي لمحاكم التفتيش.