سكان المدينة القديمة كايحتجو على الاستفادة ديالهم قدام عمالة أنفا فكازا.. والوالي امهيدية كيدخل على الخط بالصدفة .

أميمة عطية – كود كازا ///

احتجو بعض سكان المدينة القديمة فكازا، صباح الاثنين، قدام عمالة مقاطعة أنفا، بسبب الإقصاء ديالهم من الاستفادة ديال بارطمات بعدما تهدّمو ليهم الديور ديالهم، وسط حضور أمني لتأمين هاد الوقفة.

وحسب معلومات توصلات بها “كود”، فهاد الاحتجاج عرف مشاركة عدد من المواطنين، من بينهم حتى كبار فسن، اللي أكدو أنهم ما استفدوش بحجة أنهم “ما طالعينش فسيستيم”، رغم أنهم كيأكدو على توفرهم على شروط الاستفادة.

مصدر الصورة

وبحسب نفس المصدر، وبالصدفة، تلاقاو المحتجين بالوالي ديال جهة الدار البيضاء سطات، محمد امهيدية، وهو داخل للعمالة، اللي توقف وسمع للشكايات ديالهم، ووعدهم أنه غادي يشوف الملف ديالهم من بعد ما يسالي الاجتماع ديالو.

وفي هاد السياق، ووفق معطيات من مصادر خاصة ب “كود”، فالملحقة الخامسة فدرب الطاليان بمقاطعة سيدي بليوط، كتوفر على نظام “الشباك الوحيد”، اللي كيجمع جميع المتدخلين فعملية الاستفادة فبلاصة وحدة باش يتسهل المسار الإداري على المواطنين.

وبخصوص هاد العملية، كتوضح نفس المصادر أن المواطن خاصو يكون مسجل فلوائح الإحصاء، ويتوفر على الوثائق الضرورية، بحال شهادة السكنى فالدار اللي تهدمت، وشهادة الهدم المسلمة من طرف السلطات.

ومن بعد، كيتوصل المستفيد بشيك كيغطي 3 شهور ديال الكراء من طرف شركة إدماج السكن، وكيكون عندو الاختيار بين الاستفادة من دعم مالي كيوصل لحوالي 10 مليون سنتيم، أو اختيار شقة.

وختمات الجهة المعنية شرح ديالها أنه، في حالة اختيار شقة، كاين دعم كيوصل حتى لـ60% من الثمن، و40% المتبقية كتكون فيها تسهيلات فالأداء، مع حضور الأبناك لتوفير القروض، وحتى عملية القرعة كتدار تما فالبلاصة