وحسب مصادر “گود” كيفما وقع لحزب الأصالة والمعاصرة فهاد الجهة، فالمنسق الجهوي للتجمع الوطني للأحرار سعيد شباعتو كتبان عليه علامات العيا بعدما شبع ترحال بين الأحزاب (كان بدا فالحركة الشعبية، وارحل للاتحاد الاشتراكي وحاليا راه فالأحرار).

المنسق الجهوي لحزب الحمامة بعدما ضمن إعادة تزكية ولدو مروان شباعتو فدائرة إقليم ميدلت، ما بقا كيهمو أش طاري فالأقاليم الأربعة الأخرى ديال الجهة.

فإقليم زاكورة مثلا، وفق مصادر “گود”، كيبان بللي البرلماني الحالي الحسين وعلال، وللي قرب يقفل 30 سنة فمجلس النواب (انتخب لأول مرة سنة 1997)، مازال ناوي يعاود ولاية أخرى واخا الحصيلة ديالو فالولاية الحالية هزيلة جدا وهي، حسب مصادر، ما كتجاوز 75 سؤال فخمس سنوات فيها 70 سؤال كتابي وفقط 5 أسئلة شفوية. الحسين وعلال كان بغا ينافسو على التزكية أحمد أيت باها، النائب الأول لرئيس مجلس جهة درعة تافيلالت وللي عندو شعبية كبيرة، لكن وعلال قطع عليه الطريق ومخلاهش يوصل للمقر المركزي للحزب وخاصة للرئيس الجديد للحزب محمد شوكي.

نفس الشيء وقع فإقليم الراشيدية للي ناض فيها شاب مقاول ومنعش سياحي ناجح اسمه موحى كراوي وأعلن عن رغبته الترشح للبرلمان، وناضت قربالة فالحزب للي كيتحكم فيه برلماني يبلغ من العمر 80 سنة هو عمرو أوجيل وللي باغي يزيد ولاية أخرى فمجلس النواب.

هاد الشي خلا المنسق الإقليمي للحزب محمد الطيبي يخرج عن صمته ويعلن عن أحقيته فالتزكية للي سبق واعدو بها المنسق الجهوي سعيد شباعتو منذ انتخابات 2021. المصادر المحلية كتقول بللي خارج المرشح الشاب موحى كراوي، حزب التجمع الوطني للأحرار فالراشيدية ممكن يفقد المقعد ديالو فهاد الدائرة.

الحزب أيضا ممكن يفقد المقعد فالدائرة التشريعية ديال ورزازات للي كيمثلها حاليا النائب الشاب يوسف شيري. انتقادات كثيرة توجهات لهاد الشاب للي هو فنفس الوقت رئيس جماعة فالإقليم كتعيش أوضاع مزرية. بالإضافة لذلك، بانت فالآونة الأخيرة رغبة قوية من رئيس المجلس الإقليمي عبد اللطيف أعفير للترشح لانتخابات مجلس النواب وللي عندو شعبية كبيرة، وهاد الشي خلط الأوراق لحزب الحمامة للي بداو كيغادروه بعض المنتخبين أبرزهم عبد الكريم أيت الحاج، رئيس الغرفة الجهوية للفلاحة، للي كيجري حاليا اتصالات للترشح للبرلمان بتزكية من الحركة الشعبية.

أخيرا، وفإقليم تنغير، الحرب شاعلة بين البرلماني الحالي عدي خزو، والمنسق الإقليمي للحزب وهو فنفس الوقت مستشار برلماني المدني أملوك. هاد الأخير، واخا راه حاليا عضو فمجلس المستشارين، ناض بغا يقدم استقالتو باش يترشح لمجلس النواب، وهاد الشي خلاه يحتافظ بالتزكية لراسو. لكن أخبار راجت مؤخرا فالإقليم كتقول بللي تم تنبيه أملوك لإمكانية أن ملف ترشيحه لمجلس النواب يترفض من قبل مصالح وزارة الداخلية، هاد الشي خلاه يتراجع على قراره وفنفس الوقت يقدم مكانو واحد المرشح ما معروفش بزاف اسمه هشام موجود.

فالأسابيع الأخيرة، قرر عدد كبير من رؤساء الجماعات بإقليم تنغير يأسسو تنسيقة محلية سماوها تنسيقية الكرامة باش يغادرو الحزب مستقبلا فاتجاه حزب الاستقلال، وعلى رأسهم النائب البرلماني الحالي عدي خزو للي، تقول مصادر محلية، كينسق هاد العملية الترحالية مع القيادي فحزب الاستقلال عبد الصمد قيوح.

حزب التجمع الوطني للأحرار فجهة درعة تافيلالت كيعيش نوع من الفوضى فمسطرة دراسة التزكيات الانتخابية بسبب سوء التنسيق وضعف أداء المنسق الجهوي، وأيضا بسبب ممارسات بعض المنسقين الإقليميين. لكن هناك أيضا التأثير السلبي ديال رئيس مجلس الجهة هرو أبرو للي شعل حرب مع الصحافة بسبب صفقة تواصل المجلس رست على شركة يملكها أخ البرلماني الحالي لورزازات. وآخر الأخبار كتقول بللي هاد الملف للي فيه شبهة تزوير قد أحيل على محكمة جرائم الأموال بفاس.