الكونفدرالية ديال تجار الحوت بالجملة كتحتج على "الخلاص" قبل السلعة.. وغادي توقف البيع بالمزاد العلني فالمرسى.. .

مصدر الصورة

أميمة ـ عطية كود ـ كازا//

علنات الكنفدرالية المغربية لتجار السمك بالجملة على مقاطعة البيع بالمزاد العلني فالمراسي ديال المغرب كامل، احتجاجاً على فرض نظام “الدفع المسبق‘‘.

وفبلاغ رسمي لي كتوفر “كود” على نسخة منو وموقع من طرف الرئيس ديال الكنفدرالية، حملات هاد الأخيرة المسؤولية كاملة على الآثار اللي ممكن تترتب على هاد لقرار، سواء فتموين الأسواق، استقرار الأسعار، أو مداخيل المهنيين، للمسؤولين على القطاع، وأكدات أن تجاهل صوت التنظيمات المهنية غادي يزيد يعمق الأزمة.

ووضحات الكنفدرالية أن هاد شي جا كرد فعل على قرار وصفاتو بـ”الانفرادي” لي غير نظام التداول المالي، وعبرات على الأسف ديالها حيت الإدارة المركزية بقات كتتجاهل المراسلات الرسمية وجلسات الحوار اللي ما عطاتو حتى نتائج ملموسة.

وأكدت، أنها قدمات مقترحات عملية ومسؤولة باش يتم تثمين الحوت والمنتوج ديالو وتضمن توازن سوق وحماية حقوق الصيادة واليد العاملة، ولكن هاد المقترحات ما تلقات حتى تفاعل.

وشددات الكنفدرالية على أن التاجر، خصوصاً الصغير والمتوسط، كيلعب دور أساسي فاستقرار السوق، حيت كيوفر السيولة اليومية وكيضمن استمرار العمليات المالية.

ومن جهة أخرى، شارت إلى أن المؤشرات الأولية فالمرسى اللي بدا فيها تطبيق النظام الجديد كاتبين انخفاض مقلق فثمن بعض أنواع الحوت، الشي اللي ممكن يأثر سلباً على مداخيل الصيادة والعمال، ويزيد يخلق اضطراب فالسوق.

وفلخر ختمات الكنفدرالية بالتأكيد على أن النضال ديالها مشروع، وكيهدف للدفاع على حقوق المهنيين، خصوصاً التجار الصغار والبحارة، ولكن باحترام القانون باش تحقق العدالة فهاد القطاع.