دايما ما كيتيرو الخطابات الخارجة عن المألوف الانتباه، وكايديرو التبرزيط والإزعاج للناس لي ولفو وعتادو على الاستهلاك بكل أشكالو، بلا تفكير ولا نقد ولا تحليل، يا إما بأفكار هركاوية أو أفكار غطاها تراب ايام زمان، وكتعرقل شعب ومكتخليش التقدم تكتامل صورتو.

في نقاش دارو وزير العدل عبد اللطيف وهبي قدام طلبة كلية الحقوق، بين فيه “الأسرار” اللي كتكون ورا صناعة القوانين فالمغرب، وشرح الصعوبات والتناقضات اللي كتعطل التحديث ديال التشريعات، خصوصاً فموضوع مدونة الأسرة.

وكال، في هاذ سياق وهبي، بأن الوزير ديما كيبقى فوسط الصراع، وكيكون مضطر يواجه مصالح قديمة ومترسخة، ووضح بأن القوانين ماشي حاجة مقدسة، ولكن غير وسيلة باش تطبق بها السياسة حسب لقناعات ديال اللي فالحكم.

ومن بعد هضر على مدونة الأسرة، ووصف النقاش اللي داير عليها بأنه “صعيب بزاف”، وانتقد الازدواجية اللي كاينة عند بعض لمغاربة، لكيقولوأنهم مع لمساواة، ولكن كيعارضوها ملي توصل للقانون.وهادشي مايمكنش ادوز عادي ، بحيت أن وزير لعدل معروف بلبوز لكيديروه معظم تدخلاتو في سوشيل ميديا وفلواقع .

وتتمة المواضيع لي تطرحات فهاد اللقاء، موضوع تزويج القاصرات، بحيث أكد وهبي، بلي خاصو يتمنع بشكل صارم، وعتبرو جريمة ما كتتغتفرش، وكال بلي البلاصة ديال البنت هي المدرسة ماشي الزواج، فوسط تصفيقات كثيرة غطات القاعة.

وزاد دافع على حق المرا باش تاخذ نصيب من الثروة ديال راجلها حيت كتكون ساهمات فيها، واستغرب كيفاش بعض الناس ك

وتكلم حتى على الأم الحاضنة، وكال ماشي معقول تتمنع تسافر بولادها وهي اللي كتربيهم وكتسهر عليهم.

ومن جهة أخرى، ربط وهبي هاد الإصلاحات بالطموحات ديال المغرب دولياً.

وزاد نبه بأن لوزارة غادي تدير قوانين قاصحة بزاف ضد اللي كيمسو بالحياة الخاصة ديال الناس فالسوشل ميديا، وقال بلي التليفون يقدر يولي وسيلة جريمة إلا تستعمل فالتصوير ولا نشر الإساءة.

وفي الأخير، قال بلي هاد القوانين الجديدة، خصوصاً مدونة الأسرة، ممكن توصل للبرلمان فالشهور الجاية (أكتوبر أو نونبر). .