كازا.. هدم كاريانات “سيدي عبد الله بلحاج” بعين سبع غادي يبدا 20 يوم من بعد لعيد لكبير…و لكلايبي ل " كود" … هدف "عين السبع بلا كاريانات" قرب اتحقق وساكنة غادي تعيش فظروف احسن .. .

مصدر الصورة

أميمة عطية كود كازا ///

علمت “كود” من مصادرها، أن السلطات لمحلية فعين سبع غادي تبدا عملية هدم كاريانات “سيدي عبد الله بلحاج” وتنقيل سكان ديالو، 20 يوم من بعد عيد لكبير، فإطار إعادة التأهيل الحضري للمنطقة.

وفي هاد السياق، تواصلات“كود” بكريم الكلايبي، نائب رئيس مجلس مقاطعة عين سبع وعضو مجلس مدينة الدار البيضاء، اللي أكد هاد الخبر، وكال إن عملية الهدم غادي تنطلق من بعد عيد الكبير بحوالي 20 يوم، واعتبر أن هاد لعملية ماشي غير ترحيل تقني، بل خطوة كبيرة فمسار التأهيل الحضري، وكتجسد التوجهات اللي كاتحط المواطن فلب التنمية.

وزاد الكلايبي ، وكال أن لمشروع كايهدف لإنهاء لعداب ديال سكانها و ديال لكاريانات وإدماجهم فأحياء سكنية مهيكلة، فيها جميع شروط لعيش الكريم، مؤكداً أن هاد الورش كايجي فإطار مجهودات كبيرة للقضاء نهائياً على هاد النوع من السكن.

و نوه بالمجهودات ديال السلطات المحلية، من والي جهة الدار البيضاء-سطات وعامل عمالة مقاطعات عين السبع-الحي المحمدي، وكافة القيادات وأعوان السلطة، على العمل الميداني والتواصل المستمر مع الساكنة، وشار ان بلي لقرب ولمشاركة اللي اعتادوها، واللي تساهم فنجاح لعملية فظروف من الشفافية والإنصاف.

وختم الكلايبي تصريحو بالتأكيد على استمرار التنسيق بين المجلس الجماعي والسلطات المحلية باش يتم طي ملف الكاريانات نهائيا،وزاد أن هدف “عين السبع بلا كاريانات” ولى قريب يتحقق على أرض الواقع.

ومن جهة أخرى، عبرات مرا من ساكنة سيدي عبدالله بن لحاج على لقلق ديالها، و أكدات أن السلطات دازت عندهم دار بدار وبلغاتهم بموعد لهدم، ولكن مازال ما واضحاش عندهم الصورة بخصوص الاستفادة ولا فين غادي يتنقلو، الشي اللي خلا بزاف منهم فحالة ترقب وكيقلبو على بدائل قبل الموعد المحدد