من قلب درب موحا أو سعيد فالمدينة القديمة.. تجار الحديد و "البوعارة" وجوه جديدة كتخرج من ورا الهدم بكازا .

أميمة عطية – كود كازا ///

هبطات “كود” لمدينة القديمة فكازا، ودارت جولة وسط دروب تبدلات ملامحها بعد أشغال الهدم، خصوصا فـدرب موحا أو سعيد ودرب الرماد، فين الأرض ولات مفروشة بتراب الحجر وبقايا ديال لحديد ونحاس وخردة كتفكرك فقصة داكشي اللي تهدم… ولكن حتى فهاد المشهد، كاينين ناس باقين كيشدو فالأمل وكيقلبو على طرف ديال الخبز، من وسط الأرض .

وسط صداع تراكسات ، لقات “كود” مجموعة من تجار لمتلاشيات، كيجمعو لحديد وكل ما يمكن يتباع، بترابورتورات وكاميونات صغار وبليدين فلمياكي وحتى بكرويلات بلبغال ، كل واحد على قد جهدو، لحركة ما كتوقفش، رويدة جديدة خدامة كتدور وبزربة قبل مايجيو ليهم صحاب لوقت .

قربنا بحذر، وسولنا واحد من هاد تجار ، اللي كان واقف حدا كاميو ديالو وكيشرف على الخدمة، وكال فتصريح خاص لـ“كود”، أنهم خدامين غير باش اعيشو، وبلي كانو عندهم محلات فدرب لنݣليز ولكن تحيدو ليهم، ودابا ولاو كيخدمو غير بهاد الطريقة… وكيقلبو فلهدم على لحديد ونحاس وأي حاجة اعاودو فيها لبيع .

وزاد ووضح ، أنه لمشكل لكبير هو انهم ما عندهم حتى إطار قانوني، ديما خدامين تحت ضعط والخوف، وخاصهم اصبرو حيت عندهم عائلات”

وأكد لمتحدت نفسو أن سلعة اللي كيجمعوها وتمشي لتجار كبار ديال لحديد أو لافيراي .

وزاد طالب كال :
“حنا ما هاربينش من القانون، بالعكس بغينا يكون عندنا نظام واضح، نخلصو الضريبة ويتحميو الحقوق ديالنا.”

وحسب شهادات من دروبا لمدينة لقديمة ، هاد لفضاءات كتعرف نشاط مجموعات كيتعرفو بـ“البوعارة”، اللي كيوصلو قبل لهدم بأيام، وكيستغلو لفرصة باش يجمعو نحاس وسلوكا ومواد خرا كتكون عندها قيمة فالسوق، فعمليات كتدوم لساعات طويلة وبشكل منظم.

لبوعارة و لهباشة” وتجار لمتلاشيات، كيبان أن عالم كامل كيتحرك وسط حياة جديدة كتبعت من لهدم ، عالم مكايتشافش لبزاف ولكن فيه ناس كتحاول تعيش وتلقى مدخول، فظل غياب تأطير واضح وحماية قانونية.

مصدر الصورة مصدر الصورة مصدر الصورة مصدر الصورة مصدر الصورة