طابوهات فلاحية فـSIAM: علاش الطاسة والحلوف محاضرينش فالمعرض الفلاحي فمكناس؟ .

مصدر الصورة

كود -مكناس//

فكل دورة ديال المعرض الدولي للفلاحة بمكناس (SIAM) كنلقاو قطاعات فلاحية غايية فالعرض والتمثيل وخا حاضرة فالأرقام والاقتصاد.

من بين هاد القطاعات، كاين قطاع الخمور، اللي وخا أنه قانوني ومنظم، وكيعتمد على مساحات مهمة ديال الكروم خصوصاً فجهة مكناس ما كيحضرش فالمعرض، القطاع ديال الطاسة كيساهم فاقتصاد الدولة، سوا من ناحية الضرائب ولا التشغيل، ولكن فـ SIAM ما كاين عندو لا رواق ولا تواصل عليه .

الأرقام كتقول بلي الاستهلاك الوطني كيوصل لمستويات مهمة، والدولة كتستافد من عائدات ضريبية بالمليارات، إضافة لكونو كيشغل آلاف العاملين وكيصدر للخارج، وخا هكاك حضورو فالتظاهرات الرسمية كيبقى غايب.

نفس الشي تقريباً مع تربية الحلوف، اللي هي نشاط قانوني ومراقَب، وكيخدم أساساً فبعض القطاعات المرتبطة بالسياحة والفندقة وحتى التصدير، وخا أنها كتخضع لمراقبة مؤسسات رسمية وكتدخل فالدورة الاقتصادية، ولكن كتغيب من واجهة المعرض.

الغياب ديال قطاعات فلاحية قانونية وعندها وزن اقتصادي من معرض SIAM كيحرم الاقتصاد المغربي من مداخيل مهمة، حيث كيتحرم قطاع بحال الخمور، اللي كيدخل مداخيل ضريبية بالمليارات وكيشغل آلاف العمال من منصة دولية للترويج وجذب المستثمرين والتعريف بالمنتوجات ديالو، نفس الشي كينطبق على قطاعات أخرى بحال تربية الحلوف، الشي اللي كيخلي تطوير تربيتو محدود بسبب غياب فضاء التبادل والتسويق.

النتيجة هي فقدان فرص للتسويق الدولي وضعف فجذب الشراكات والاستثمارات، وغياب نقاش تقني قادر يطور هاد الأنشطة، وبالتالي الخسارة اقتصادية وتنموية كتأثر على تنافسية الفلاحة المغربية وعلى قدرتها باش تفرض راسها بقوة فالسوق الدولي.