صادرات مطيشة ديال بلادنا لأوروبا وصلات لـ745 ألف طن ف2024/2025 .

مصدر الصورة

كود – أكادير //

وصلات صادرات مطيشة فالموسم ديال 2024/2025 لـ745 ألف طن، بمعدل وصل حتى لـ80% مقارنة مع العشر سنين اللي فاتو، بهاد الرقم ولى المغرب ثالث أكبر مزوّد للسوق الأوروبية من بعد إسبانيا وهولندا، ولكن ف2025/2026، متوقع تنقص شوية بسبب مشاكل فالمناخ.

السر ديال هاد النمو ماشي غير فالكميات، ولكن حتى فالتغيير ديال نوع مطيشة، حيت دابا كاين تركيز كبير على مطيشة “سوريز” اللي ولات كتشكّل تقريباً 59% من الصادرات، بمعنى أن القطاع ولى كيركز أكثر على الجودة والقيمة، ماشي غير الكمية.

السوق الفرنسية مازال هي الكبيرة، ولكن بزاف ديال مطيشة كانت كانشي لمدينة بيربينيان ومن تما كتعاود تتوزع لدول أخرى بحال ألمانيا والدول الاسكندنافية والنمسا.

ولكن دابا المصدرين المغاربة بداو كيمشيو مباشرة لهد الأسواق بلا ما يدوزو من فرنسا داكشي علاش حصة ألمانيا تزادت بزاف فهاد السنوات، حتى ولا المغرب كيوفر تقريباً 50% من مطيشة الصغيرة اللي كتتباع تما.

من جهة أخرى، السوق كيبقى متركز فعدد قليل ديال الشركات، خصوصاً فجهة سوس ماسة، فين أكبر 10 شركات كيتحكمو فـ65% من الصادرات، عاد كاينين شركات كتركز غير على سوق وحدة، وشركات أخرى كتحاول توسع لأسواق جديدة بحال بريطانيا وأفريقيا.

ولكن وخا هاد النجاح، كاينين تحديات كبار، أولهم قلة الماء، اللي خلات الفلاحين يعتمدوا بزاف على تحلية مياه البحر، الشي كيرفع التكاليف وحتى اليد العاملة والطاقة ولات غالية، وهاد الشي كيضغط على الأرباح.

المستقبل ديال القطاع غادي يبقى مرتبط بتحسين الجودة، تنويع الأسواق، وتطوير مناطق جديدة للإنتاج بحال الداخلة، ولكن فالمقابل خاص استثمارات كبيرة خصوصاً فالماء باش يبقى الإنتاج مستقر.