امراة وگادة: العيالات المغربيات شادين نسبة 41% من الخدامي فالصناعة المغربية.. وفاتو فرنسا ومريكان .

مصدر الصورة

كود – كازا //

كيبان أن القطاع الصناعي فالمغرب ولى فيه تحسن كبير فإدماج العيالات مني وصل معدل المساواة لـ 41%، حسب دراسة تعرضات فالدورة الأولى ديال اليوم العالمي للمرأة فالصناعة.

وحسب نفس المصدر، فالمغرب كيفوت دول كبار بحال فرنسا (30%)، ومريكان (28.7%)، وبريطانيا (28.4%) ،هاد الحضور القوي ديال العيالات باين بزاف فبعض القطاعات المهمة، بحال النسيج اللي فيه 62%، والصناعة الدوائية بـ44%، والصناعات الغذائية بـ43%، وحتى صناعات السيارات والطيران والجلد بـ41%.

ما بين 2015 و2025، تبدل سوق الشغل الصناعي بشكل كبير، وولات كاينة قيمة مضافة أكثر. وفنفس الوقت، نقصات نسبة النساء فبعض المناصب البسيطة لـ48% (ناقص 4 نقط)، وهاد الشي كيبين باللي العيالات طالعين لمناصب فيها مهارات عالية وخلاص حسن
.
دابا العيالات كيشكلو 32% من الوظائف اللي كتطلب حرفة كبيرة، بزيادة 6 نقط فـ10 سنين. وهاد التقدم جاي خصوصاً من قطاعات السيارات، النسيج، والصناعات الغذائية.

حتى فالمناصب القيادية، كاين تقدم ملحوظ، حيث وصلات نسبة العيالات فمناصب كبار المسؤولين والمديرين لـ30% (زادت بـ8 نقط مقارنة مع 2015). ونفس الشي بالنسبة للمناصب الإدارية (31%)، والمهندسين والأطر (30%)، والتقنيين (33%).

قطاع الطيران ولى من أبرز المجالات اللي كيعطي فرص العيالات، حيث كيمثلو 39% فالمناصب المؤهلة. وحتى فالهندسة، وصلات النسبة لـ42%، وكاين تقدم كبير فالمناصب القيادية.

أما الصناعة الدوائية، فهي نموذج قوي فالمساواة، حيث كتحافظ على نسبة ديال النساء ما كتنزلش على 41% فكل المستويات. وكتوصل حتى لـ44% فالمناصب ذات مهارات عالية و42% فالمناصب القيادية.