المغرب جغرافيا جا قبالت جوج أكبر البلدان سياحيا في العالم فرنسا والصبليون، فاش كنقولوا فرنسا كنقولوا التاريخ العريق والمحفوظ بعناية الروماني القوطي وباقي العصور حتى ليوم، وكنقولوا أعظم المتاحف الموزعة على كامل البلاد، والثقافة والفن والطبيعة والمطبخ، وهادشي مايمكنش لينا نفاسوه في المغرب أو نكونوا بديل عليه وحتى دولة في العالم مايمكن تتافسوا، وفاش كنقولوا الصبليون كنذكروا الجو الزوين والسمش والمدن العتيقة والتاريخ، وأهم حاجة الماكلة والشراب والاحتفال والنشاط ليل ونهار، وهادشي يمكن لينا نافسوه إلى بدلنا القوانين لي كتخلي المغرب بلاد كئيبة بئيسة شعبها طالعة ليه الحياة في راسوا وغادي نحو الانقراض.

إسبانيا هي أكبر بلاد فيها البيران بالنسبة لعدد السكان في العالم، الساحل الاسباني كيعرف ماتسط ديال ثلتمية نهار ديال الشمس في العام، أكثر حاجة مشهورة بيها من غير الكورة هي تشيرينگيتو، كونطورات على الرملة كيسربيو الكوكتيلات والطاپا، هادشي لي كيخليها جنة بالنسبة للبريطانيين لي كيمثلوا أكبر عدد من السياح لي كيزورو اسبانيا وخصوصا كوستا دلصول، والمغرب راه عندو اجمل الشواطئ ونفس معدل الأيام المشمسة في السنة، ولكن للأسف الشواطئ خالية تقريبا العام كامل من غير الصيف راه غير كينشو الذبان.

مدينة مثلا بحال المضيق عندها شاطئ ذهبي حقيقي ولما زرق وأغلب السنة راكد زربية، ولكن معندها ماتوفر من ناحية الترفيه وغالي من لفوق، ولكن لنفترض أن داك الكورنيش من مارتيل حتى لكاستييخو يكون كامل تشرينگيتوات، ويتدار تران من مطار تطوان حتى الفنيدق ويدوز جنب السواحل كلها، وشراكة بين المطار وشركة رايان اير، وعموما تسهيلات لشركات الطياران راه هوما لي غادي يجيبو السياح، وطبعا تغيير القوانين المتخلفة لي كتقيد الحريات في المغرب وكتخليه دولة متزمتة لافرق بينها وبين أي دولة خرى إسلامية متشددة، راه دابا نيت بسباب هاد القوانين كاين ناس في الحباسات كتعاني منهم ابتسام لشگر، الوصفة راه واضحة وساهلة علما اننا دولة عطاتنا الطبيعة جو وشواطئ خيالية، ولكن للأسف هاحنا سادين على راسنا بقوانين قروسطية لي كيجي مكيعاود يرجع، واصلا كيجيو غير يطلوا علينا ويشوفوا العالم كيفاش كان في ألف ليلة وليلة. راه تشيريگيتو هو مستقبل السياحة في المغرب وهو لي يقدر يجيب السياح ويخليهم يعاودوا يرجعوا اما القرودة ديال جامع لفنا دغيا كيطلعوا في الراس.