تحقيق : اتفاقية 2009 لإعادة هيكلة دوار لعطاونة إقليم الحو.. 17 عام ديال الروطار و21 مليار سنتيم صعبات التنفيذ..شكون المسؤول؟ (تصاور) .

كود -مراكش//

دوار لعطاونة التابع لجماعة تمصلوحت فعمالة تحناوت، واللي بعيد غير بـ15 كيلومتر على مراكش، كاين فواحد المنطقة اللي ولات كتجيب مشاريع سياحية كبار بحال “فيرمونت رويال بالم”، “ساماناح” و”رويال رانش” ،ولكن وسط هاد الواجهة الراقية، كاينة ساكنة كتفوت 8000 نسمة، عايشة فوق مساحة 65 هكتار، ولي مازال كتعاني من روطار مشروع إعادة الهيكلة اللي تعطل لأكثر من 15 عام.

مصدر الصورة
القصة بدات فـ2009، ملي تطلق مشروع إعادة الهيكلة فإطار اتفاقية رسمية، وتدارت حتى إحصائية للسكان، وساهمات وزارة الإسكان والتجهيز بـ300 مليون سنتيم ،ولكن المسار ما كانش ساهل، حيث تبدلات المعطيات على الأرض من بعد ترحيل ساكنة دوار النخيل بأولاد يحيى، وزيد عليهم ناس جداد لي جاو من ارض مشروع “رويال بالم”، الشي اللي خلا عدد السكان يتضاعف فدوار العطاونة ، وتفرضات إعادة الدراسة من جديد.

هاد المستجدات خلات شركة العمران تراجع المشروع وترفع الكلفة لـ5 مليار و800 مليون سنتيم، ولكن المشكل تقني ومعقد حيت مكاينش بلاصة فين دار محطة تصفية المياه العادمة (الواد الحار)، خصوصاً أن الدوار دايرين به مشاريع سياحية حساسة، اللي ممكن تتأثر بالروايح و التلوث.

مصدر الصورة

من هنا دخلات الشركة الجهوية متعددة الخدمات (لاراديما سابقاً) على الخط بصعوبة، وبدات سلسلة طويلة من المراسلات والدراسات، الشركة رفضات الدراسة الأولى ديال “العمران” وطلبت إعداد دراسة جديدة كتحترم المعايير التقنية ،ومورا عدة تعديلات، توصلات انه فقط غير الربط بشبكة التطهير السائل بوحدو غادي يكلف 2 مليار و800 مليون سنتيم،

من ناحية التمويل، ساهمات عدد من الأطراف: وزارة الإسكان بـ300 مليون سنتيم (2009)، مشروع “رويال بالم” بـ1.4 مليار سنتيم (2019)، والجماعة بـ400 مليون سنتيم (2024). ولكن وخا هاد المساهمات مكانتش كافية.

مصدر الصورة

قدّام هاد الوضع، طالبت الشركة الجهوية بضمانات مالية كاملة، واقترحات اتفاقية شاملة فيها وزارة الداخلية، وزارة الإسكان والتجهيز، وزارة المالية، الجهة والجماعة، باش تجمع 21 مليار سنتيم.

اليوم، المشروع مازال متوقف مورا الدراسات وتعقيد المساطر، والساكنة باقية كتسنى تدخل فعلي من السلطات، وعلى راسهم عامل الإقليم السيد المصطفى المعزة، باش يتحرك الملف ويخرج لحيز التنفيذ.

مصدر الصورة