فجلسة اليوم الخميس 16 ابريل 2026 ، فمحكمة الاستئناف فالدار البيضاء، وقف المحامي أشرف جدوي من هيئة الدفاع ، باش يدافع على سعيد الناصري، وقدم مرافعة دامت لساعات طويلة ، كيحاول فيها يبين بأن التهم اللي موجهة لموكلو ما عندهاش أساس قوي.

المحامي، فهاد السياق كال بأن القضية فيها بزاف ديال الحوايج اللي ماشي واضحة، واعتبر أن المالي ،باغي يضرب فمصداقية الأجهزة الأمنية ديال المغرب.

وزاد تساءل: ايلى كان فعلا الناصري كيتاجر فالمخدرات من 2013، كيفاش الأجهزة الأمنية ما شداتوش طول هاد المدة؟

ومن جهة أخرى، أشار المحامي أن التحقيق من البداية ما كانش محايد، حيت كيركزو غير على الحوايج اللي ممكن تورط الناصري، وتجاهلو أي حاجة تقدر تبين براءتو.

ورجع هيئة الدفاع ، وكال بخصوص اللقاء اللي قالو وقع فـ17 دجنبر 2013 فدار لطيفة رأفت، ان هاد الرواية مكدوب ، حيت كاين دليل ديال “التموقع الجغرافي” كيبين أن الناصري كان داك النهار فالرباط، ففندق هيلتون، حيت كان حاضر لجلسة فالبرلمان، وكاينين وثائق كيثبتو هاد الشي لي كانت تقدمات بها عيئة الدفاع من قبل .

وزاد ان ، شهادة الخادمة “فاطمة” كانت مهمة، حيت قالت قدام المحكمة أن الناصري ما جاش فداك التاريخ، وأن اللقاء اللي كان بينو وبين “إسكوبار” كان غير لقاء عادي شربو فيه أتاي ومشا فحالو.

الدفاع حتى انتاقد كون بعض الشهود ما تسمعاتش ليهم المحكمة، بحال زوجة الغزاوي، اللي قالو أنها ما شافتش الناصري داك النهار، وهاد الشي كيقوي الشك فالقصة كاملة.

وزاد المحامي قال بأن اللقاءات اللي كانت بين الناصري و الحاج بنت إبراهيم فدار لطيفة رأفت كانت غير مناسبات اجتماعية، وما كان حتى حديث على المخدرات.

وبخصوص الادعاءات ديال الفلوس اللي كانت كتدوز من لاكاف ، الخادمة نفت هاد الشي كامل، وقالت ما شافت حتى درهم.

وفالأخير، الدفاع بين مغالطات الاتهامات اللي كتقول كاين تهريب كميات كبيرة ديال المخدرات (بحال 40 طن ولا 300 كيلو)، وقال: “جيبوا الدليل”.

وختم المرافعة ديالو، أن الملف ما فيه حتى دليل قوي، لا تقني لا مادي، وأن القضية كلها مبنية على أقوال ما كافية باش تدين شي واحد فمحكمة، خصوصاً وأن العقوبات فهاد النوع ديال القضايا ممكن توصل حتى لـ10 سنين حبس.

مسلسل ملف “اسكوبار الصحراء ” مازال مكمل ، وهيئة الدفاع مازال مكملة تفنيد الادعاءات لمالي وضحدها بمنطق الأدلة والجلسات حتا هي غادة باسترسال ، وتم تأجيل المرافعة جاية الخميس 24 أبريل علو ساعة التانية بعد الزوال .