علن النعم ميارة، الكاتب العام للاتحاد العام للشغالين بالمغرب (الذراع النقابية لحزب الاستقلال)، باللي ما غاديش يترشح فالمؤتمر الجاي، وقرر يخلي بلاصتو لقيادة جديدة.

ميارة قال ف بلاغ صحفي بلي المرحلة كتطلب “إفساح المجال” مع الحفاظ على الاستمرارية واحترام المؤسسات.

ميارة، فبلاغ رسمي، وضّح باللي مغاديش يخرج من الساحة النقابية، وغيبقى حاضر كمناضل “الساهر المؤتمن” على هاد المرحلة الحساسة، وغايركز باش يدوز المؤتمر فظروف مزيانة، بلا صداع وبلا تشتيت. الهدف، حسب كلامو، هو الحفاظ على وحدة النقابة وتجاوز هاد المنعطف التنظيمي لي دايرة فيه دابا.

المؤتمر الوطني الاستثنائي ديال الاتحاد، غادي يتدار نهار الأحد 26 أبريل 2026 فـقصر المؤتمرات الولجة بسلا، وغادي يناقش جوج نقاط كبار: التقرير الأدبي والمالي، ومن بعد انتخاب الكاتب العام والمكتب التنفيذي، وفق القانون الأساسي ديال النقابة.

ميارة حاول يبرد الأجواء، وقال باللي الاتحاد خاصو يبقى “فضاء للنضال الوحدوي” وماشي ساحة للصراعات، خصوصاً فهاد الظرفية الدقيقة لي كتعرف نقاشات وتدافعات داخلية. وذكّر باللي القوة ديال العمل النقابي جاية من التماسك والانضباط، ماشي من التفرقة.

وزاد أكد باللي كيشوف راسو على نفس المسافة من جميع الأطراف، وما داخل حتى فشي اصطفاف، وشكر الناس لي ساندوه، معتبراً باللي الدعم لي خدا خاصو يتحول لدعم للوحدة، ماشي وقود للانقسام.

وتعرض ميارة قبل ف الايام الأخيرة لحملة قاسية من طرف نقابيين كانو معه ودار معهم المزيان ومنهم لي وظفهم ف فالبرلمان وحسن ليهم الوضعية الاجتماعية.. لكن خواو بيه واختارو ينقلبو عليه وهادشي لي تحقق بعدما قرر ميارة ينسحب بلا مشاكل ولا صداع.