حسب نفس المصادر للي هضرات مع “گود”، من المتوقع يتم الحسم في تزكية المرشحين للبرلمان، السيمانا الجايا، ولكن المفاجأة هي أن العمدة ديال طنجة منير الليموري مستبعد يكون وكيل لائحة.

مدينة طنجة للي كتعتبر “حلبة صراع” قوية بين المتنافسين فالاحزاب، كانت فيها معركة كسر عظام بين البام والبي جي دي ف2011 و2016 قبل ما يجي الأحرار ف 2026 ويهزم صحاب بنكيران فهاد المدينة للي فيها المحافظين قويين وعندهم امتداد جمعوي واقتصادي. اليوم الاحزاب الثلاثة القوية فالحكومة مازالا تالفا، خصوصا البام والاستقلال لي كيعيشو صراعات داخلية قوية وحروب التزكيات، فالوقت للي الاحرار حافظ تقريبا على نفس الوجوه فهاد المدينة.

وكان تروج على نطاق واسع وسط صالونات طنجة، بلي المنافسة فالبام على شكون ياخد يصوگ التراكتور فطنجة، كاينا بين جوج ديال الرؤوس منير ليموري (العمدة) وعادل الدفوف (البرلماني الحالي).

مصادر محلية فطنجة كتقول بلي عادل الدفوف مسنود من طرف القيادة الجماعية، خصوصا وانه مقرب من وزير الشغل الحالي يونس السكوري. لكن عندو مشاكل كثيرة خصوصا ف تجارتو وخدمتو، بحيث كانت نقابة الاتحاد الوطني للشغل احتجت مرارا ضد ما وصفته ب”استغلال العمال العاملات” ف لوزين التابع لشركتو نوفاكا فاشيون، وراسلت وزير الشغل باش يتدخل ولكن والو، ومشاكل اخرى.

أما ليموري للي الحلم ديالو يدخل البرلمان انطلاقاً من كونه عمدة لأكبر مدينة في الشمال، وزايدها برئاسة جمعية رؤساء الجماعات في المغرب كامل، وهادشي بالنسبة للمقربين منو كيعطيه الشرعية باش ينقز من تسيير الشأن المحلي لداخل قبة البرلمان. لكن حتى هو قفرها ف عدد من الملفات.

العمدة الليموري معروف بالفشل التدبيري في طنجة، اللي الساكنة ديالها كتشكى من ضعف النظافة والإنارة وبلوكاج المشاريع.

المأزق ديال ليموري ماشي غير في “الحصيلة الصفرية”، بل في الفضائح اللي ضاربة المحيط ديالو، وعلى رأسها اعتقال المستشار ديالو اللي كان كيتعتبر “يدو اليمنى”.