گاع الگنوس فالعالم كامل كايحتارمو راسهم و كايحتارمو بنات بلادهم إلاّ عندنا حنا كاتلقى الحقد المنوي كايتزاد عام على عام. ماعمرك تلقى شي هندي كايعاير الهندية و كايقوليها وا الزرگة و لا تلقى شي كحل كايعاير شي كحلة باللون ديالها و لا شي ياباني كايعاير شي يابانية بسيري يا مغرّزة العين ! إلاّ عندنا حنا فين ماكاين شي هرگاوي موضّر باغي يتشهر شوية و يجمع شوية د المتابعين البراهش كاينوض يعاير المغربيات بال”قهويات” !
الگنس الوحيد فالعالم كامل لي كايعاير بنات بلادو باللّون ديال البشرة لي هوا براسو عندو ! واش المغربيات حيط قصير لي ناض يعايرهم ؟ واش بعض الرجال ولاو كايعبرو على الفشل ديالهم العاطفي و الجنسي و المادي بالعنصرية اتجاه المرا لي كاتفكرهم بالفشل ديالهم ؟

واش المغربيات خاصهم يكونو روسيات باش تحتارموهم ؟ خاصنا نوليّو زعرات و بلقات و عندنا غوز باش بنادم يسد داك الدلقوش الخانز ؟ وا لي ناض كايعاير المغربيات بالقهويات ! الزرگات ! الموسطاشات ! واش هاد المغربيات كايخرجو من لاميزون ؟ كايتباعو فأوطوهول ؟ كاين شي كاطالوگ فيه الألوان و خبيناه عليكم ؟ آ سيدي لا قهويات راه جيناتكم لي زرگة، و لا قهويات راه المني لي فملاويكم لي قهوي ! منين بغيتو هاد المغربيات يجيبو ليكم الزعورية و البيوضية و الغوز ؟

ثم لنفرض حنا قهويات آ بوقال ! و من بعد ؟ شنو المشكل ؟ هادي راه هي العنصرية ! التمييز على اساس اللون لي كايهضرو عليها المنظمات و كايحاربوها عباد الله فالعالم كامل، حنا مازالة عندنا عايشة بيخير و على خير خلاوها فرانسيس.

Elle a de beaux jours devant elle

المدونة و القوانين ماكافينش باش المرأة المغربية يترد ليها الاعتبار فهاد البلاد راه خاص قوانين صارمة كاتمنع التمييز على أساس الجنس و لا اللّون، و خاص القانون يتدخل خصوصا فالحالات لي مؤثرين و ناس مشاهير عندهم متابعين كايعطيو لراسهم الحق يمارسو العنصرية اتجاه المغربيات ! خاص القانون يكون صارم و جمعيات الدفاع عن المرأة يتحزّمو و ينوضو فاش واحد فحال عبد الفتاح جوادي يعاير المغربيات بالقهويات ! فنّان قاليك يا حسرة ! طز على الفن و طز على الكوميديا ! انسان لي ديجا عندو ايسطوريك مقود مع العيالات و فايت تحاكم ففرانسا بتهمة التهديد بالقتل في حق مراتو مت ولادو ! طز ! واش ماكاتشوفش اللون ديالك آ فتاح ؟ تبغي نقولو ليك لاش كايشبه و لا نسدو هاد المحضر ؟
سير سير راه لي فيك كافيك !