"أحرار" طنجة كيسخنو للانتخابات الجاية. بولعيش معول والغاشي خرج على راسو بالشواهد وبنجلون كينوعر .

مصدر الصورة

علي الصافي كود طنجة////

مع قرب الاستحقاقات التشريعية الجاية، حزب التجمع الوطني للأحرار في مدينة طنجة كيعيش حركية داخلية لافتة، هدفها ترتيب البيت الداخلي والحفاظ على النتائج الإيجابية اللي حققها الحزب في الانتخابات اللي فاتت. الحزب دابا كيدرس الخيارات المتاحة باش يختار “البروفايل” اللي غادي يقود لائحة “الحمامة” بدائرة طنجة-أصيلة.

المعطيات اللي كتروج في كواليس الأحرار في طنجة، كتهضر على أن النقاش محصور حالياً بين مجموعة من الأسماء البارزة، وكل واحد فيهم عندو لي كيدفع بيه باش يكون وكيل للائحة.

ونبداو بعبد الواحد بولعيش، رئيس فريق الأحرار بجماعة طنجة، اللي كيعول بالأساس على الرصيد اللي بناه في العمل الجمعوي والميداني في طنجة، والحضور الدائم ديالو وسط الناس، وهو الشيء اللي كيخليه، حسب مناصريه، بروفايل عندو قاعدة شعبية وازنة.

أما البروفايل الثاني فهو عصام الغاشي، نائب عمدة مدينة طنجة، اللي كيتطرح الاسم ديالو كخيار ثاني. الغاشي كيراهن على التجربة ديالو في تدبير الشأن المحلي وموقعه في الجماعة، وهادشي، حسب لي كيساندو، يقدر يعطيه مشروعية مؤسساتية باش يمثل الحزب في المحطة الجاية.

مشكلة هاد الغاشي هو رفضو يمشي يخدم فالمحافظة العقارية بالحسيمة بعد ما نقلاتو الادارة. هاد السيد باش يبرر يبقى فطنجة، كيعطي شواهد طبية باللي فيه شي مرض نفسي. دابا هادا غير على هادوك الشواهد ما خاصوش ياخذ التزكية

وكاينة أسماء أخرى من بينها البرلماني الحالي الحسين بن الطيب لي كتستبعد مصادر “كود” يعاود ياخذ التزكية، بسبب مأ أسمته تراجع الأسهم ديالو، وحتى مورو ما بقاش متحمس له.

وكاين أيضا النائب الأول للعمدة محمد الغزواني الغيلاني المعروف بغيلان، وخا مصادر “كود” اعتبرت غيابو عن اللقاء التواصلي الجهوي لي نظمو الحزب وترأسو شوكي مؤشر على ابتعادو عن سباق التزكية.

وكاين واحد كيتسنى فالدورة واسمو مرتابط بالترحال السياسي فطنجة وهو يوسف بنجلون. كان فالاحرار ومشى للاتحاد الاشتراكي ودابا عندو مشكل مع ادريس لشكر الكاتب الاول الاتحاد الاشتراكي وطامع فصداقتو مع رشيد الطالبي العلمي باش يرجع. غير هو ما فاهمش باللي الرئيس الجديد محمد الشوكي باغي يجيب الشباب ووجوه جديدة ونقية ماشي بحالو والطالبي العلمي سالات مهمتو فالتجمع الوطني للاحرار نهار بكى على اخنوش فالمؤتمر الاستثنائي

ودبا طبعا، القرار النهائي كيبقى في يد القيادة المركزية للحزب في الرباط، اللي غادي تحسم في هوية وكيل اللائحة بناءً على التقارير المحلية والمعايير اللي حطها الحزب، باش يضمن الأحرار الحفاظ على المكتسبات ديالهم في “عروس الشمال”.