شنو كيسحاب له راسو؟ خارق القانون ومخرج عينيه ومحزم بشركة تواصل مكروهة عند الصحافيين: شكيب عاشور لي جرات عليه هواوي داير فيه فرعون معرض جايتيكس ولابس نظارات فيهم كاميرا بلا ما يتدخل السغروشني لي مرتو كتمول ليه معروض .

مصدر الصورة

احمد الطيب كود الرباط//

فوسط أجواء معرض “جيتكس إفريقيا المغرب”، للي كان مميز هاد العام، تنظيما وحتى مشاركة وحضور الشركات وبانو عباقرة مغاربة فيه..هادشي كولشي زوين وفيه لمسات مغربية مبدعة، ولكن ديما كيكون شي حد مسؤول وسط النجاحات كيخربها على كولشي. بحال واحد كيقدم راسو بحال سفير دولة اجنبية فالمغرب، ويخرق القانون بالعلالي قدام المكلفين بمراقبة هاد القانون.

هاد المسؤول هو المدير العام شكيب عاشور، اللي بان فعدة مناسبات داخل قاعات العرض وحتى فواحد البرنامج الإذاعي، وهو لابس نظارات فيها كاميرا، كتخلي إمكانية التصوير والتسجيل ممكنة بلا ما يكون حتى إشعار واضح للناس اللي حداه ولا اشعار للسلطات بأنه هاز كامير ف عينيه كيصور. هاد السلوك خصو نقاش على احترام القانون، خصوصاً ففضاءات فيها صحافيين وزوار ومهنيين.

القانون المغربي واضح فهاد النقطة. القانون 09-08 ديال حماية المعطيات الشخصية كيلزم أي واحد كيجمع أو كيصور معطيات ديال الناس، خاصو يعلمهم ويحدد الهدف من داك الشي، وما يكونش تصوير عشوائي ولا خفية. استعمال نظارات بكاميرا ففضاء عام، بلا حتى إخبار، كيطرح شبهة خرق هاد المقتضيات، خصوصاً إلا كان التصوير كيهم وجوه ومعطيات يمكن تحدد هوية الأشخاص.

الأكثر من هاد الشي، هو الصمت ديال اللجنة الوطنية لمراقبة حماية المعطيات الشخصية، اللي مفروض فيها تراقب بحال هاد الحالات.

اللجنة، اللي كيرأسها عمر السغروشني، عليها شبهة تضارب مصالح، لأن المعني بها كيشتغل مع زوجة السغروشني، وزيرة الانتقال الرقمي. هي للي كتمول هاد جايتيكس.

هاد الصمت خلا البعض يطرحو تساؤلات على دور اللجنة ديال حماية المعطيات الشخصية واش كتخدم بنفس المعايير فكل الملفات، ولا كاين انتقائية.

من جهة أخرى، كولشي عارف بلي هاد عاشور محزم بشركة تواصل مكروهة عن الصحافيين وخدات مارشيات بطرق خصها تحقيقات ومهام استطلاعية برلمانية، هي شركة “PR ميديا” باش تشرف على العلاقات العامة والتواصل ديالو، لذلك كيمشي عند مومو يتبورد يدور على قنوات الاعلام العمومي.

هاد الشركة، حسب ما تكتب من قبل، عندها سوابق فالتوتر مع الصحافة، وطريقة خدمتها ماشي بروفيسيونيل، وهو ما خلا عدد من الصحافيين يشتاكيو من صعوبات فالوصول للمعلومة والتغطية، بل كاين لي قاطع انشطتها بحال “گود”.

وفوق من هاد الشي كامل، كيبان أن عاشور كيعطي إشارات مثيرة بحيث سبق ليه بان فوسائل الإعلام وهو لابس كوستيم فيه علم الإمارات بلا مايكون علم المغرب خصوصا وانه معرض ديالو كيتمول بفلوس المال العام، واش عندو جنسية اماراتية ويمثل دولة الامارات يقولها، ولا غير كيتملق لها فهاد الظروف الدولية لي واقعا باش يحافظ على بلاصتو، خصوصا وانه كاينا انباء كتقول بلي الامارات بغات طيرو من ذاك المنصب بسبب تصرفاتو وأخطاءو والشوهة ديال صفقة جايتيكس العام لي فات.