كتبنا البارح ف”كود” مقال على منتخب رئيس مقاطعة طنجة المدينة لملايري حميد ابرشان. فيه المشاكل لكثيرة اللي كيعيشها. استهدافو كرجل اعمال وسياسي من قبل والي الجهة يونس التازي. المقال بعنوان “اللي هدر يمشي ليه رزقو. واش الوالي التازي كيصفي حساباتو مع المنتخبين. غياب ابرشان على تصميم التهيئة كيكشف المستور”.

فهاد المقال هدرنا على هاد المنتخب اللي كان رئيس اتحاد طنجة وجاب البطولة للمدينة واللي دابا كاين استهداف ليه. حولو اراضي ديالو لمناطق خضراء فتصميم التهيئة الجديد وقلنا باللي هادي ضرب ليه ماشي اهتمام بالبيئة وقلنا باللي الوالي قرر يوقف ليه تجزئة عقارية فگزناية واخا فيها حكم قضائي نهائي كيأكد صحة الترخيص. بلا ما نهدرو على اقامة ديالو فايبيريا اللي عندو فيها مشاكل مع محاسن البركة الوكالة الحضرية.

دابا هادا منتخب وملايري وبرلماني فالغرفة الثانية ورئيس مقاطعة طنجة المدينة ومع ذلك كيعيش الجحيم. البينزس ديالو واقف. المثير هو انو عوض ما يطلب دعم جمعيات حقوقية ويوصل قضيتو للبرلمان، ناض بالخوف كتب تدوينة فصفحتو. قال فيها باللي المقال بلا ما يسميه المنشورات “المسمومة” التي تحاول الزج باسمي في أمور لا علاقة لي بها، وتأويل بعض الوقائع بشكل مغلوط يخدم أهدافًا معينة”.

هدفنا يا منتخب هو تكون راجل ودافع على راسك وما تخافش من الوالي. ياكما عيط ليك وخلعك ومن الخلعة درتي هاد التدوينة. قلتي باللي غبتي على اشغال الدورة الاستثنائية لجماعة طنجة بسباب مرض الواليد ديالك الله يشافيه. قلنا ما كاين باس. قلتي باللي “مشروع تصميم التهيئة، فقد ناقشناه داخل مقاطعة طنجة المدينة، وأبدينا رأينا بكل وضوح، وتم التصويت عليه بالإجماع، وذلك في إطار مؤسساتي يحكمه القانون، لأننا في دولة قانون ومؤسسات” هنا بنتي خايف وخاصك دافع على راسك.

وكذبتي باش قلتي باللي ما كاين حتى خلاف بينك وبين والي الجهة. هنا بنتي كتخاف منو. كان عندك مشاكل مع الوالي الاسبق حصاد ومع الوالي السابق محمد مهيدية ودابا راه عندك مشاكل كثيرة مع هاد الوالي.

واش عقلتي العام اللي فات دار فيك الوالي التازي دورة خايبة فاجتماع ديال الوكالة الحضرية وكاين الفيديو ديالها. الوالي ارتكب خطأ وما عندوش الحق يهينك. راه قال ليك “المشروع ديالك ما غاديش يدوز”. هنا كان تعسف كبير على القانون. على دولة القانون والمؤسسات. ماشي من حق والي يهدر بهاد الكلام. اللي كيمنع مشروع يدوز هو القانون ماشي نزوات والي.

السي ابرشان انت سياسي وعارف راسك مظلوم. راه ما مستهدفاك حتى شي جهة سياسية. اللي نشراتو “كود” كولو صحيح وانت مظلوم. كتخلص تحالفك السابق والحالي مع العدالة والتنمية”

“كود” ما كتكلمش عليك كشخص. كتكلم عليك كحالة. راه حالة خطيرة يكون عندك لفلوس ومنتخب ورئيس مقاطعة ورجل اعمال وما قادرش دافع على راسو. ياك سبق ليك رديتي على الوالي يونس التازي فدورة يونيو للمقاطعة ديال طنجة المدينة ف2025 وقلتي بشجاعة “غادي نقولو الحقيقة سواء اراد من اراد او كره من كره”، فإشارة مباشرة لما يعتبره محاولة من الوالي لإخراس المنتخبين، وإلباسهم تهم الدفاع عن “مصالح خاصة”

وهدرتي على البناء العشوائي وعدم ربط الساكنة بالماء والكهرباء. اتهمتي الوالي بحرمان المواطنين من حقوق أساسية، وقال بلي المنتخبين ماعندهومش سلطة لإيقاف البناء، وبأن الإدارة الترابية هي المسؤولة عن تطبيق القانون.

اش وقع ليك حتى ركبك الخوف اليوم. راه اسمك ما كيستغلو حد. انت رجل سياسة. ما قادرش دافع على راسك من والي ما قدم والو للمدينة، كيفاش تقدر دافع على المواطنين.