منسق مبادرة “الحوت بثمن معقول” لـ“كود”: الاستفراد فبيع الحوت وغياب متاجر القرب هو السبب علاش المغاربة ماكيكلوهش ! .

هناء ابو علي كازا ///

فإطار مواصلة اللقاء اللي عرفاتو اليوم مبادرة “الحوت بثمن معقول” بكازا، تم التطرق لواحد من أهم المستجدات فالسوق، وهو الحوت المجمد اللي ولى كيدخل بقوة باش يخلق المنافسة ويعاون على تقليص الضغط على الأثمنة وتحسين العرض الموجه للمستهلك المغربي.
وهاد المبادرة، حسب المعطيات اللي تم تقديمها، عرفت نجاح كبير خلال شهر رمضان، بحيث وصل حجم التسويق ديال الحوت المجمد لـ6844 طن، توزعات على أكثر من 50 مدينة و1100 نقطة بيع، وبأكثر من 20 صنف من الحوت المجمد، الشي اللي شجع الحكومة بشراكة مع المهنيين على تعميم التجربة على طول السنة.

ومن جهة أخرى، كود سولات سؤال مباشر لمنسق المبادرة عبد العزيز عباد: علاش المغاربة ماكيكلوش الحوت؟
وفي جوابه، أكد عباد أن الإشكال ماشي راجع غير فالثمن، ولكن حتى فطريقة التوزيع وضعف نقاط البيع المنظمة وغياب متاجر القرب المتخصصة فبيع الحوت.

وأوضح أن المواطن المغربي إلا بغا يشري الحوت اليوم كيتفاجأ بصعوبة فالوصول ليه، وهاد الشي كيدفع بزاف ديال الناس يمشيو لنفس الباعة المعروفين فالمرسى، اللي كيتحكمو فالسوق وكيأثرو على الأثمنة فغياب منافسة حقيقية، وبالتالي كيرتفع الثمن وماشي فمتناول الجميع.
وأضاف أن إدخال الحوت المجمد غادي يخلق دينامية جديدة داخل السوق، ويساهم فتعزيز المنافسة وتنويع العرض، وبالتالي دعم القدرة الشرائية ديال المواطنين.

كما شدد على أن الحل الأساسي كيبقى فتنظيم قطاع بيع الحوت وإحداث متاجر القرب، باش تولي مراقبة وتوازن فالسوق ومايبقاش الاستفراد فالاسعار.

وختم بالتأكيد على أن الشراكة بين كتابة الدولة والمهنيين ضرورية باش يتنظم القطاع أكثر، ويتقرب الحوت من المستهلك المغربي بثمن معقول وجودة مضمونة.

مصدر الصورة