باغيين يشغلو لبلاد. "البوطا” غادي تحبس 48 ساعة.. ورئيس الجمعية لـ“كود”: “ما بقيناش قادرين نكملو بهاد الظروف.. وإذا ما تحلاش المشكل غادي نزيدو فالمدة ! .

منذ

هناء ابو علي كود ///

قرروا موزعين “البوطا” فالمغرب يوقفو التوزيع لمدة 48 ساعة، يومي 21 و22 أبريل الجاري، فخطوة احتجاجية بسبب الظروف الصعيبة اللي ولى كيعاني منها القطاع وارتفاع المصاريف.

وفي هاد السياق ، قال محمد بنجلون، رئيس الجمعية المهنية لمستودعي الغاز السائل، فتصريح خاص لـ“كود”، باللي المهنيين ما بقاوش قادرين يكملو الخدمة بهاد الوتيرة، بسبب ارتفاع تكاليف النقل والصيانة والأجور، وزيد عليها الزيادات المستمرة فـ“الغازوال”، الشي اللي ولى كيزيد يضغط على النشاط ديالهم.

وأضاف باللي تم توجيه مراسلات للجهات الحكومية المختصة أكثر من مرة، وعقدو اجتماعات مع مسؤولين، ولكن لحد الساعة ما كانوش حلول عملية ترضي المهنيين، خصوصاً فيما يخص مراجعة هامش الربح ولا دعم كيغطي هاد الزيادات.

وأوضح أن قرار التوقف المؤقت جا من بعد ما تم استنفاد جميع سبل الحوار، مؤكداً أن هاد الخطوة ممكن تصعد وريدى في الأيام حسب التطورات إلا بقات نفس الظروف.

ومن جهة اخرى أكد على انه رغم التوقف، المهنيين غادي ابقاو حالين المستودعات بشكل محدود باش يقدرو المواطنين، خصوصا أصحاب المطاعم والخدمات، يشريو قنينات “البوطا” حسب الكميات المتوفرة، باش ما يكونش انقطاع كامل.

ومن المنتظر أن يخلق هاد القرار قلق فعدد من القطاعات اللي معتمدة على الغاز المنزلي، خصوصاً إلا تم تمديد مدة التوقف، الشي اللي يقدر يزيد الضغط على الجهات المعنية باش تلقى حلول فورية.