نبيل بنعبد الله: الزعيم لي تلف الكتاب دابا خاص شي حد يعاود يكنش فيه .

مصدر الصورة

فاطنة لويزا – كود ////

سي نبيل بنعبد الله يمكن هو أكثر أمين عام في حزب مغربي لي كيكثر من الخرجات، ولي كيدوي بزاف، طبيعي انه يغلط بزاف، هادشي عادي.

لكن الخايبة هو تصيد وانت كبير في السن من طرف شاب عاد قال بسم الله في العمل الحزبي.

وهادشي شي لي طرا ليه في ديك البرنامج السياسي الجديد فالدوزيم.
شاب معندوش خبرة سياسية كبيرة قدر انه يطفي الحجرة لزعيم الشيوعيين المدرحين.

طفا ليه الحجرة لدرجة ان سي نبيل تحول إلى واعظ ديني.
حيد توني فورم ديال الشيوعيين، ولبس الكندورة ديال الخوانجية، وبدا يعطي فدروس الأدب والأخلاق لديك الشاب.

مشكل نبيل فديك البرنامج هو انه ما كانش قاري سواريه، واخا هو زعيم حزب الكتاب.
حيت نسا انه مع شاب كينتمي للجينيراسيون ديال دابا.
وهاد الجينيراسيون معندومش مع لغة الخشب، والنظريات، وتعواج الهدرة.

ما يمكنش تغمق عليهوم بديك لغة: التمفصلات، والالتقائيات والتناقض الثانوي والتناقض الرئيسي.

هادا جيل كيمشي مباشرة للموضوع بدون مقدمات.. جيل كود ونيشان..

نبيل بنعبد الله ما عارفش بلي راكم شلا كوارث، وهاد الكوارث ولات بحال شي حجار، فين ما مشى كتبقا ديك الحجار وراه، لي جا يشير عليه بيهوم.

ما عاندو باش يقنع عباد الله بالاستمرار ديالو على رأس الحزب من 2010، ولي جا ليه مباشرة من رئاسة الشبيبة الاشتراكية.
يعني واحد بقا سنوات طويلة وهو رئيس الشبيبة ديال الحزب، لدرجة ان الشيب بان فيه، وهو مازال رئيس الشبيبة.
ما خرج من ديك الشبيبة، حتى تقاد ليه الكرسي ديال الأمانة العامة للحزب.

ورغم انه كانو سميات أقدم منو، وأنضج منو، وقدمات للحزب الكثير، فهو لي وصل للأمانة العامة، حيت عندو ميزة ما عندش لوخرين، وهي شوية ديال التبلطيج.

الحزب ديك الساع كانت فيه حركة تصحيحية، فيها أسماء قوية، بحال الراحا شمعون ليفي، وسعيد سعدي لي كانت عندو ديك الساع شعبية كبيرة وسط مناضلي الحزب، وخصوصا النساء، وكلشي كان كيعتبرو ضحية ديال الإصرار ديالو على تنفيذ الخطة الوطنية لإدماج المراة في التنمية أثناء حكومة التناوب التوافقي بقيادة سي عبد الرحمان اليوسفي، ولكن للأسف حتى القيادة البيروقراطية ديال الحزب ضحات بسعيد السعدي خوفا من نتائج الانتخابات، وخوفا من تصاعد المد الأصولي، لي سعيد السعدي كانت عندو الشجاعة ديال المواجهة معه، ماشي بحال نبيل لي كان كيبيض الصفحة ديال الخوانجية.

وبسبب ديك التبلطيج لي كان معروف به، اختارتو القيادة البيروقراطية ديال الحزب باش يكون الأمين العام، غير على ود يواجه مجموعة السعدي وشمعون ليفي، وبالفعل نجح فهاد المهمة، مهمة لي استئصالية بامتياز، ولي خلات الحزب يفقد زوج من انظف السياسيين في البلاد.

شمعون ليفي غيرد ليه الملك الاعتبار من بعد ما غيكلفو بإلمتحف اليهودي، ولي دار فيه خدمة كبيرة للحفاظ على الموروث اليهودي المغربي.

وسعيد السعدي غيخلي العمل الحزبي، وغيركز على العمل المدني، حتى تحول اليوم لواحد من المراجع في العالم فيما يخص الاقتصاد التضامني والحركات الاجتماعية.

وهاديك كانت غير البداية وفقط، حيت نبيل ما كفاهش يطرد الرفاق ديال تيار “ما زلنا على الطريق”، بل صفى حتى لي عاونوه يوصل للأمانة العامة، وعلى أي واحد غيعارضو.

كان المرحوم خالد الناصري هو الوحيد لي ما يقدش نبيل يتطاول عليه.
وهادشي ما نساهش نبيل بنعبد الله، واخا سي خالد الناصري اليوم في رحمة الله.

ولذلك كل ما كيتحاصر نبيل بنعبد الله فيما يخص حراك الريف، وكيجبدولو ديك البيان لي وقع عليه الحزب، وفيه اتهام ضمني للروافة بالانفصال، وكيواجهوه بالتناقض بين التوقيع على ديك البيان، وبين المطالبة اليوم بالعفو على المعتقلين ديال الحراك، كيجاوب بلي ان لي وقع البيان هو خالد الناصري. مع العلم انه مستحيل يوقع الناصري البيان دون موافقة الأمين العام.

وخالد الناصري ما وقعش البيان فبلاصة نبيل لي رفض، كيما كيبغي يوهما نبيل بنعبد الله.

لي طرا، هو ان أحزاب الأغلبية اتفقات على ان الوزراء ميوقعوش البيان باسم الأحزاب ديالهوم، باش ميوقعش خلط بين الحكومة والأغلبية.

البيجيدي مثلا كان وقع سليمان العمراني، حيت الأمين العام العثماني كان وزير، والتجمع الوطني للأحرار كان وقع الطالبي العلمي حيت الرئيس عزيز اخنوش كان وزير، ولهذا وقع خالد الناصري عن التقدم والاشتراكية حيت نبيل بنعبد الله كان وزير.

الحاجة الثانية لي كان خاص نبيل بنعبد الله يخوي الكرسي لشي حد آخر، والحزب عامر بالأطر، هو الإعفاء ديالو من طرف الملك، بعد الاختلالات المرتبطة بمشروع “الحسيمة منارة المتوسط”، هاد الاختلالات لي كانت سبب في واحدة من أكبر الأزمات الاجتماعية والسياسية في البلاد لي مزال الجراح ديالها مستمرة لحد الآن.

نبيل بنعبد الله كيبغي يغمق ويصور نفسو غير ضحية فديك الإعفاء من اجل تهدئة الأجواء في الحسيمة، وهاد الكلام ما فيه أدنى احترام للمؤسسة الملكية، لي ما يمكنش تقدم وزير كبش فداء باش تحل توتر اجتماعي، حيت الملك عندو الشجاعة ديال تسمية الأسماء بمسمياتها، ولذلك دار خطاب شجاع في نقد النموذج التنموي لي كان سبب في الوضع، اما إقالة نبيل وغيره، فكانت إقالة مؤسساتية، حيت الملك ما دار الإعفاء إلا من بعد صدور تقرير المجلس الأعلى للحسابات لي فيه كل الاختلالات المرتبطة بديك المشروع.

هادشي بلا ما ندويو على ان نبيل بنعبد الله كان موضوع بلاغ ديال الديوان الملكي لي وصف نبيل بانه كيمارس التضليل السياسي، بعد ما اتهم مستشار ملكي بانه كيدعم حزب معين ضد باقي الأحزاب.

نختمو بواحد الحاجة، دابا كل حزب كيدخل الانتخابات الهدف ديالو يفوز بيها، وإذا فاز بها فرئيس الحكومة غيكون من هاد الحزب، وأقرب واحد هو رئيس الحزب نفسو، وخصوصا ان الملك حافظ على هاد العرف.

دابا أي أمين عام ديال أي حزب عندو فرصة يكون رئيس الحكومة إذا جا الحزب ديالو هو الأول في الانتخابات إلا نبيل بنعبد الله.

ما يمكن يكون حتى وزير، حتى كاين قرار ملكي بان كل الوزراء لي تعفاو بسبب ملف الحسيمة منارة المتوسط، مغديش يتعينو مستقبلا في أي منصب رسمي.

غير هادي كانت خاص تخلي الحزب ينتخب امين عام آخر..