علمت “كود” ان رئيسة جماعة سيدي بليوط البامية كنزة الشرايبي وقعات على قرار مزيان كيهم “سطاد فيليب” الشهير اللي سميتو دابا العربي بنمبارك. هاد الشي اكداتو الشرايبي ل”كود”.

وحسب معطيات حصلات عليها “كود” قرار الهدم ماشي للملعب كولو اللي تبنى وما صالحش لكرة القدم بسباب فضايح مهندسو والمسؤولين على المشروع.

الترياب كيهم 22 محل تجاري كانو كيبيعو من لمسمن حتى القهوة والماكلة، بالاضافة الى اغلاق مقر 11 جمعية كانت مستافدة بسباب علاقاتها السابقة وغادي تيريب حتى 4 ديور كانو شي وحدين مستافدين منها هادي سنوات فيهم اللي شدها من 1999 وكانو كيخلصو والو للجماعة. حددو المبلغ ف15 فالمائة من الصالير. كاين شي ريع وشفرة كثر من هاد الشي.

فسطاد فيليب كانت حتى ملحقة ادارية ديال سيدي بليوط. نهار كاع المقاطعات كيديرو اضراب هادو كيفتحو وكيدورو الحركة مزيان.

حتى الباركين اللي فيه شي 200 بلاصة غادي يخوى. تصورو باركين فهاد العدد كان مكري ب50 الف درهم للشهر صافي. يعني كيكريو لبلاصة غير ب250 للشهر.

تهيئة هاد المعلمة الرياضية الكازاوية غيشمل حتى لبلايص اللي محيطة بيه. حسب ما علمته “كود” ف”لابوست” اللي كاينة حدا الملعب غادية تولي متحف لكرة القدم.

وكاين مشاريع اخرى لمحيط الملعب باش يولي متنزه لبيضاوا.

حسب ما علمته “كود” فان الوكالة الحضرية مع جماعة سيدي بليوط تجمعو مع جمعية “كازا ميموار” اللي كتهتم بتراث المدينة المعماري وكانت اصوات مع تحويل هاد الملعب ل”ارينا”. منتزه لبيضاوا وفضاء للحفلات فالليل. كازا ما عندهاش شي “ارينا”. ايلى جبتي شي فنان معروف ما عليه غير بمركب محمد الخامس او شي قاعة رياضية.

سطاد فيليب عندو موقع استراتيجي. وسط لمدينة وحداه المحطة ولوطيلات.. تصدق فيه “ارينا” مزيان.

حسب ما علمته “كود” كاع المحلات فالمشروع الجديد غادية تكون على الرياضة. كلشي على السبور. لا كرعين لا مسمن لا حرشة