علمت “كود” من مصدر مطلع أن حزب الاتحاد الاشتراكي استقطب دقة واحدة ثلاثة أعضاء من المكتب السياسي لحزب الاتحاد الدستوري، فواحدة من أكبر عمليات الترحال السياسي كتهم أعضاء مكتب سياسي قبل شهور قليلة من الانتخابات المقبلة. خصوصا وأن الاحزاب الثلاثة الكبرى (الأحرار والبام والاستقلال) سادين الباب على الترحال السياسي لأنه عندهم “الباكاج ديال المرشحين عامر”.

هاد الأعضاء هوما: أمين المسيوي – جماعة الحوز، حميد عكرود – إقليم الرحامنة، أحمد التومي قلعة السراغنة (هو رئيس جماعة في المنطقة التي اندلعت فيها أحداث مواجهة وعنف بين القوات العمومية والسكان).

الغريب فهاد عملية الترحال والانتقال الانتخابوي، هو كان من بين أسباب الاحتقان والصداع لي وقع مؤخرا فقلعة السراغنة، بحيث أن ترشيح التومي باسم الاتحاد كانت باتفاق مع البرلماني الاتحادي يت الحاج للي عندو مقلع ديال استخراج الأحجار اللي تسببت فالمواجهات.

“كود” ربطت الاتصال بمحمد جودار، الأمين العام لحزب الاتحاد الدستوري، باش ناخدو موقفو من هاد الاستقطاب، وهل كان باتفاق معه. طبعا “لا يجيب”، حسب مصادر “كود” مشغول بتوزيع التزكيات والوعود الانتخابية.

جودار، مشا بعيد، حسب مصادر “كود”، كايتقال بلي كيستعمل منصبو داخل جامعة الكرة باش يستقطب رياضيين سابقين ومدربين سابقين ورؤساء أندية باش يترشحو معه فحزب الاتحاد الدستوري. وحتى هو ركب موجة “التشبيب” وباغي يرشح شي شباب ف كازا.

محمد جودار، هو رئيس مقاطعة ابن امسيك ونائب برلماني، عزيز عليه التبوريدة ماشي غير حيث رمز حزبو هو العود، فالعام لي فات كان دار مهرجان تبوريدة وهو باش دار الدخول السياسي.

جودار ما محسوب لا فالأغلبية الحكومية لا فالمعارضة البرلمانية وهو سنوات كثيرة وهو عضو مكتب مجلس النواب، حالف لا يتفارق مع مع نيابة رئيس المجلس كثر من عشر سنين، ولكن للي غريب الحصيلة صفر، لا مقترحات قوانين مهمة، لا أسئلة كتابية فارضا راسها، لا حتى تدخلات كتحمر الوجه وكتعطي اشعاع سياسي له.

جودار ولشكر وبنعبد الله وبنكيران وعدد من الأمناء العامين، طولو بزاف ف السياسة والعمل البرلماني. جات الوقت يعطيو فرصة لجيل جديد ف عهد جديد ديال مغرب المونديال ومابعد احتجاجات جيل زيد. ولكن يبدو ان هاد السياسيين مفهموش مساجات جيل زيد وبقا شادين فمناصبهم، ومنهم لي غادي يعاود يترشح.