كشف مصدر مطلع داخل حزب التجمع الوطني للأحرار، ل”گود”، بلي قرار تعيين الشاب ياسين عكاشة على رأس الفريق النيابي للحزب الأول في البرلمان، هو جواب سياسي على “بعض الزعماء اللي مولفين يصلقو فالكراسي أكثر من عام دون تغيير ولا اعطاء فرصة للشباب”، وهو كذلك استمرار لنهج الحزب منذ اعلان عزيز اخنوش عدم الاستمرار في رئاسة الحزب تاركا الفرصة لجيل جديد من القيادات.

الأحرار، وفق نفس المصدر، فالقرار ديال تعيين عكاشة فلقاء داخلي بعاصمة سوس، هو كذلك اعادة ترتيب الأوراق داخل الأغلبية، كيتزامن مع اقتراب عرض الحصيلة الحكومية والدخول التدريجي فالأجواء الانتخابية. وهي كذلك رغبة للرئيس السابق، للي بدا عملية تشبيب مناصب المسؤولية ودفع شباب فعدة مسؤوليات منها وزارية وبرلمانية وغيرها.

الأحرار دار هاد الخطوة مباشرة مور نقاش سياسي داز على قناة عمومية بين شاب ف الأحرار وزعيم فالمعارضة، باش يأكد على دعمو للشباب خصوصا وانه هاد الحزب كيتوفر على تنظيم شبابي قوي.

هاد التعيين ماشي غير تغيير تنظيمي عادي، وفق نفس المصدر بل عندو دلالات سياسية واضحة. عكاشة هو خلف لقيادات سبق لها دازت من نفس الموقع، أبرزها محمد شوكي، اللي ترأس الفريق قبل ما يتسلم قيادة الحزب. وهاد الشي كيعكس واحد التقليد داخل “الأحرار”، اللي كيعتبر الفريق البرلماني مدرسة لإنتاج القيادات وصناعة القرار السياسي. وفيه مساج كذلك للخصوم والحلفاء بلي هذا عهد جديد خصو نخب جديدة.

اختيار عكاشة، يضيف نفس المصدر، هو رهان سياسي للحزب على جيل جديد من السياسيين. نائب شاب، ولكن حاضر ميدانياً، وعندو تجربة فالترافع داخل البرلمان وعلى مستوى الدائرة الانتخابية ديالو. وقريب من المواطنين، وعندو قدرة فالتوصل السياسي بشكل مقنع، هادشي بان ف عملو داخل اللجان وكذلك ف ترافعو على الجماعات الترابية ف اقليم بنسليمان.

الأغلبية الحكومية مطالبة اليوم بالدفاع على حصيلتها، بالأرقام، بشرح الاختيارات والإصلاحات، والرد على انتقادات المعارضة، وهادا اول امتحان لياسين عكاشة، واش ينجح فيه ولا لا. الايام تجاوب.

عكاشة، البرلماني عن حزب الأحرار ورئيس جماعة مالين الواد، عندو علاقة جيدة مع باقي الفرقاء السياسيين، خصوصا وزراء الاغلبية، بحيث ان الوزير الاستقلالي رياض مزور كيتقرب منو باش يعاونو يترشح ف بنسليمان، الدائرة للي معروف بنفوذ عائلة ال عكاشة.